Azərbaycana müşaiyətsiz gələn 18 yaşına çatmamış əcnəbilər və vətəndaşlığı olmayan şəxslər haqqında məlumat bazası yaradılır

Bakı/22.07.22/Turan: İyulun 22-də dövlət başçısı Azərbaycan Respublikasının ərazisinə müşayiətsiz gələn və ya gəldikdən sonra müşayiətsiz qalan 18 yaşına çatmamış əcnəbilərin və vətəndaşlığı olmayan şəxslərin vahid məlumat bazasının yaradılması haqqında fərman imzalayıb. 

Fərmana əsasən, Azərbaycan Respublikası Dövlət Miqrasiya Xidmətinin vahid miqrasiya məlumat sistemində "18 yaşına çatmamış müşayiətsiz əcnəbilər və vətəndaşlığı olmayan şəxslər barədə məlumatlar" altsistemi yaradılması nəzərdə tutulur.

Dövlət Miqrasiya Xidmətinə  altsistemin formalaşdırılmasını 2022-ci il oktyabrın 1-dək təmin etmək, altsistemin aparılması, həmçinin fəaliyyətinin təşkili və inkişaf etdirilməsi üçün zəruri tədbirlər görmək; DİN-in, Səhiyyə Nazirliyinin, Əmək və Əhalinin Sosial Müdafiəsi Nazirliyinin, Təhsil Nazirliyinin, Dövlət Sərhəd Xidmətinin, Ailə, Qadın və Uşaq Problemləri üzrə Dövlət Komitəsinin, İcbari Tibbi Sığorta üzrə Dövlət Agentliyinin və yerli icra hakimiyyəti orqanlarının həmin altsistemə çıxışını təmin etmək tapşırılıb.

Dövlət orqanları Azərbaycan ərazisinə müşayiətsiz gələn və ya gəldikdən sonra müşayiətsiz qalan 18 yaşına çatmamış əcnəbilər və vətəndaşlığı olmayan şəxslər barədə məlumatları aşkar etdikdə, həmin məlumatların aşkar edildiyi tarixdən 1 iş günü müddətində altsistemə daxil olunmasını təmin etməlidirlər. 02D