Azərbaycanın Ermənistana qarşı ərazi iddiası yoxdur, lakin azərbaycanlıların öz doğma torpaqlarına qayıtmaq hüququ var - İlham Əliyev

Bakı/02.08.23/Turan: Azərbaycanın Ermənistana qarşı ərazi iddiası yoxdur, lakin bu ölkədən zorla deportasiya edilən azərbaycanlıların iki ölkə arasında diplomatik münasibətlər normallaşdıqdan və qurulduqdan sonra ora qayıtmaq hüququ var. Bu fikirləri Azərbaycan prezidenti İlham Əliyev “Euronews” telekanalına müsahibəsində deyib.

“Ermənistan sülh istəyirsə, biz buna nail olacağıq. Çünki bizim Ermənistana qarşı heç bir ərazi iddiamız yoxdur və onların da Azərbaycana qarşı ərazi iddiası olmasını istəmirik”, - deyə Əliyev bildirib.

Müharibədən əvvəl Ermənistanda yüz minlərlə azərbaycanlı yaşayırdı, onlara qarşı genişmiqyaslı etnik təmizləmə aparılıb, onların mədəni və dini irsi tamamilə məhv edilib. “Biz hesab edirik ki, Azərbaycan və Ermənistan münasibətlərini normallaşdıran və diplomatik əlaqələr quran zaman Ermənistandan zorla deportasiya edilmiş azərbaycanlıların ora qayıtmaq hüququ var”, - deyə Əliyev deyib.

2020-ci ildə 44 günlük müharibədən sonra Azərbaycan “beynəlxalq hüququn tanınmış prinsipləri olan sülh sazişinin prinsiplərini işləyib hazırladı, Onlar ərazi bütövlüyünün, suverenliyinin, bir-birinin beynəlxalq sərhədlərinin qarşılıqlı tanınması, sərhədlərin delimitasiyası, güc tətbiq etmə və ya güc tətbiq etmə hədəsinin olmamasıdır”.

Ermənistanın “konstruktiv yanaşması” olsa, bu ilin sonuna kimi sülh sazişi imzalana bilər, deyə o bildirib və qeyd edib ki, hazırda Ermənistanla Azərbaycan arasında sərhədin yaradılması və kommunikasiyaların bərpası məsələləri danışıqlar masasındadır.

O xatırladıb ki, Ermənistan bizə Naxçıvana çıxışı təmin etmək öhdəliyini imzalayıb, lakin bu hələ baş verməyib.

Ermənistan-Azərbaycan nizamlanmasında vasitəçilikdə Qərblə Rusiya Federasiyası arasında rəqabət məsələsinə münasibət bildirən Əliyev xatırladıb ki, “atəşkəs sazişinin – 10 noyabr 2020-ci il tarixli Bəyannamənin bağlanmasında məhz Rusiya vasitəçi olub”.

“Bu, nə Birləşmiş Ştatlar, nədə ki, Avropa İttifaqı idi. Ermənistanın baş naziri ilə ilk görüşlərim Rusiya tərəfindən Rusiyada təşkil olunub. Rusiya–Ukrayna müharibəsindən sonra vəziyyət dəyişdi və biz gördük ki, Birləşmiş Ştatlar və Avropa daha fəal oldular. Əslində, prosesin kimin tərəfindən aparılacağı və ya prosesi kimin müəyyən dərəcədə inhisara götürəcəyi bizim üçün böyük fərq etmir. Nəticəyə gəlmək vacibdir. Biz sülh sazişinin bağlanmasına kömək edən hər kəsi dəstəkləyəcəyik”, - deyə Əliyev bildirib. 06B