Azərbaycanın xarici işlər naziri avropalı səfirlərə erməni əhalinin reinteqrasiyası üzrə tədbirlərdən danışıb

Bakı/27.10.22Turan: Oktyabrın 26-da Azərbaycanın xarici işlər naziri Ceyhun Bayramov Avropa İttifaqına üzv ölkələrin Bakıda akkreditə olunmuş diplomatik nümayəndəliklərinin rəhbərlərilə görüşüb. Bu barədə Xarici İşlər Nazirliyinin mətbuat xidmətinin məlumatında deyilir.

Görüş zamanı Azərbaycanla  Avropa İttifaqı arasında siyasi, iqtisadi, energetika, investisiya, təhsil və digər sahələrdə əməkdaşlığın cari gündəliyi, həmçinin regiondakı vəziyyətlə bağlı fikir mübadiləsi aparılıb.

Bayramov Avropanın enerji təhlükəsizliyinin təmin edilməsində və enerji təchizatının şaxələndirilməsində Azərbaycanın rolundan danışıb. Bununla əlaqədar  bu il iyulun 18-də i qarşılıqlı anlaşma memorandumunun imzalanmasının vacibliyi vurğulanıb. Sənəd Avropa İttifaqına qaz nəqlinin həcminin iki dəfə artırılmasını, həmçinin alternativ enerji mənbələrinin inkişafı sahəsində əməkdaşlığın genişləndirilməsini nəzərdə tutur. Nazirin sözlərinə görə, işğaldan azad edilmiş ərazilərdə geniş enerji potensialı var və Azərbaycan bu potensialdan səmərəli istifadə etmək üçün bir sıra layihələr həyata keçirir.

Bayramov investisiya və ticarət sahəsində əməkdaşlıq potensialına da toxunub. O, Şərq-Qərb nəqliyyat dəhlizinin inkişafı istiqamətində Azərbaycanın səylərini  qeyd edib. Bayramov bu kontekstdə qeyd edib ki, Azərbaycanın regionda kommunikasiyaların açılması istiqamətində atdığı addımlar, o cümlədən Zəngəzur dəhlizinin işə salınması Ermənistanın qeyri-konstruktiv mövqeyilə qarşılaşır.

Nazir Azərbaycanla Ermənistan arasında münasibətlərin normallaşması prosesi, sülh müqaviləsinin imzalanması, regionda yaşayan erməni əhalinin reinteqrasiyası üzrə atılan addımlar barədə iştirakçılara məlumat verib. O həmçinin sülh prosesinə xələl gətirən piyada əleyhinə mina təhlükəsi və erməni təxribatlarına diqqəti yönəldib.

Öz növbəsində, Avropa İttifaqının Azərbaycandakı nümayəndəliyinin rəhbəri  Pyotr Mixalko qeyd edib ki, yüksək səviyyədə əlaqələr əməkdaşlığın inkişafında mühüm rol oynayır. Bununla əlaqədar  Azərbaycanla Avropa İttifaqı arasında yeni saziş layihəsinin tezliklə tamamlanmasının əlaqələrin gələcək inkişafına mühüm töhfə verəcəyinə əminlik ifadə olunub.

Sonra nazir diplomatik missiyaların rəhbərlərinin çoxsaylı suallarını cavablandırıb. 06