Bakı Fransa Xarici İşlər Nazirliyinin rəhbərini tənqid edib

Bakı/07.10.22/Turan: Oktyabrın 5-də Fransa Xarici İşlər Nazirliyinin rəhbəri Ketrin Kolona Fransa Milli Assambleyasının deputatının sualını cavablandırarkən erməni xalqı ilə həmrəy olduğunu bildirib və “Azərbaycanla bağlı tamamilə əsassız çağırışlar” edib. Bu barədə Azərbaycan Xarici İşlər Nazirliyinin mətbuat xidmətinin rəhbəri Leyla Abdullayevanın şərhində deyilir.

“Yaxşı olardı ki, Avropanın aparıcı qüvvəsi olan, beynəlxalq hüquq prinsiplərinin keşikçisi qismində çıxış edən, Azərbaycanla Ermənistan arasında münasibətlərin normallaşması prosesində vasitəçi olmaq istəyən bir ölkənin rəsmisi neytral, qərəzsiz və ədaləti mövqedən çıxış etsin”, - Abdullayeva deyib.

Qeyd edək ki, Ketrin Kolona sentyabrın 13-də Ermənistan-Azərbaycan sərhədində “erməni əsirlərin güllələnməsini” hərbi cinayət adlandırıb.

O həmçinin Azərbaycan qüvvələrinin Ermənistan ərazisindən çıxarılmasına çağırıb və Rusiyanı "2020-ci il müharibəsindən sonra iddia etdiyi arbitr rolunda çıxış etmək iqtidarında olmamaqda” ittiham edib. 02D