Bayramov O`Braynlə görüşüb

Fevralın 16-da Münhen Təhlükəsizlik Konfransı çərçivəsində Azərbaycanın xarici işlər naziri Ceyhun Bayramov ilə ABŞ dövlət katibinin Avropa və Avrasiya məsələləri üzrə köməkçisi Ceyms O’Brayn arasında keçirilən görüşdə Azərbaycan və Ermənistan arasında normallaşma məsələləri və regiondakı vəziyyət müzakirə olunub.

“Görüş zamanı iki ölkə arasında ikitərəfli və çoxtərəfli gündəlikdə duran məsələlər, habelə Azərbaycan və Ermənistan arasında ikitərəfli əsasda normallaşma prosesinin perspektivləri müzakirə olunub”, - Azərbaycan XİN-nin məlumatında deyilir.

Bayramov amerikalı diplomatın diqqətini Ermənistanın şərti sərhəddə bu yaxınlarda törətdiyi təxribata cəlb edib.

Bayramov 5 ay sabitlik hökm sürəndən sonra heç bir təhrikedici amil olmadan snayper atəşi nəticəsində Azərbaycan hərbi qulluqçusunun yaralanması ilə nəticələnən Ermənistan təxribatının sülh prosesinə zərbə vurmaq məqsədi daşıdığını qeyd edib.

Bununla yanaşı, Avropa İttifaqının Ermənistandakı missiyasından Azərbaycan əleyhinə təbliğat vasitəsi kimi genişmiqyaslı sui-istifadənin yolverilməzliyi qeyd olunub.

Bayramov qeyd edib ki, Aİ missiyasının qondarma “binokl diplomatiyası” onun regional sabitlik, eləcə də Azərbaycan və Ermənistan arasında etimad quruculuğuna töhfə vermək kimi bəyan edilmiş məqsədlərinə ziddir.

Sülh sazişi layihəsinə gəldikdə Ermənistanın Konstitusiyasında, qanunvericilik aktlarında, beynəlxalq təşkilat və məhkəmələrdə ölkəmizin ərazi bürövlüyü və suverenliyinə qarşı davam edən iddialar bir daha xatırlanıb. Azərbaycanlı nazir bu iddialardan əl çəkməyin vacibliyi vurğulanıb.

“Görüşdə, habelə qarşılıqlı maraq doğuran digər ikitərəfli və regional məsələlər ətrafında fikir mübadiləsi aparılıb”, - deyə Azərbaycan XİN-nin məlumatının yekununda deyilir.