Berdıməhəmmədov SOCAR rəhbəri ilə “Dostluq” yatağının işlənməsi məsələlərini müzakirə edib

Bakı/25.06.21/Turan: Türkmənistan prezidenti Qurbanqulı Berdıməhəmmədov dünən Azərbaycan Dövlət Neft Şirkətinin (SOCAR) rəhbəri Rövnəq Abdullayevi qəbul edib.

Türkmənistan prezidentinin mətbuat xidmətinin məlumatına görə, işgüzar mühitdə keçirilən görüşdə qeyd edilib ki, Türkmənistan və Azərbaycan böyük iqtisadi, enerji və nəqliyyat-logistika potensialına malikdir, bu da strateji cəhətdən önəmli sahələrdə qarşılıqlı səmərəli fəaliyyət üçün geniş imkanlar yaradır.

Neft-qaz sənayesində, birgə layihələrin həyata keçirilməsində tərəfdaşlığın perspektivləri haqqında fikir mübadiləsi aparılıb. Xəzərdə “Dostluq” yatağında karbohidrogen resurslarının kəşfiyyatı, işlənməsi və mənimsənilməsi ilə bağlı məsələlər ətraflı müzakirə predmeti olub. Qeyd edilib ki, hazırda müvafiq ikitərəfli sazişin hazırlanması davam edir.

Xatırladaq ki, “Dostluq” (“Kəpəz”) yatağı uzun illər boyunca Bakı və Aşqabad arasında mübahisə predmeti olub. 2020-ci ildə tərəflər onu 30% Azərbaycana və 70% Türkmənistana olmaqla bölmək barədə razılığa gəliblər. Xəzərin mərkəzindəki bu yatağın ehtiyatları 50 milyon ton neft olaraq qiymətləndirilir. -02D-