BEYNƏLXALQ EKSPERT: AZƏRBAYCANDA HƏTTA SIRAVİ İNSANLAR DİSSİDENT VƏZİYYƏTİNDƏDİR

    Son 5 ildə Azərbaycanda ifadə azadlığı sahəsində vəziyyət xeyli pisləşib. Bu, təkcə jurnalistlərə deyil, QHT, gənclər hərəkatları və siyasi partiya fəallarına və hətta sıravi vətəndaşlara münasibətdə də belədir. Bu fikri «Obyektiv TV» İnternet televiziyasına (obyektiv.tv) müsahibəsində «Artikl 19» beynəlxalq ifadə azadlığını müdafiə təşkilatının eksperti Rebekka Vinsent bildirib.
     Ötən həftə «Artikl 19» «Azərbaycanda ifadə azadlığı: dissident kimi yaşamaq» adlı hesabat yayıb. Bundan başqa, Vinsent jurnalist və hüquq-müdafiə təşkilatlarının nümayəndələrindən ibarət beynəlxalq missiyanın tərkibində Azərbaycanda olub.
     Onun sözlərinə görə, hesabat üzərində iş zamanı fəallar və jurnalistlərlə müsahibələr aparılıb. «Əlbəttə ki, jurnalistlərin və blogerlərin hökuməti tənqid etdiklərinə görə mühakimə edilməsi, siyasi partiyaların ofisləri olmaması, partiya liderlərinin xaricə gedə bilməməsi narahatlıq doğurmaya bilməz», deyə Vinsent bildirib.
     O, həmçinin son 5 ildə müstəqil və müxalif mətbuat nümayəndələrinin xeyli azaldığını qeyd edib.
     «Bundan başqa, özünüsenzura dərin kök salıb və hökumətin İnternet-televiziya üzərində nəzarət qurmaq planları narahatlıq doğurur», deyə o bildirib.
     Vinsentin sözlərinə görə, beynəlxalq missiya yaxın günlərdə Azərbaycana səfərin yekunlarına dair müfəssəl hesabat açıqlayacaq. Hesabatda mətbuata və ifadə azadlığına qarşı sistemli təzyiqlərlə bağlı narahatlıq ifadə olunacaq.
     Vinsent hakimiyyətin beynəlxalq missiya ilə görüşməkdən imtinasını və həbsdə olan jurnalist və blogerlərə baş çəkmək imkanı yaratmamasını «biabırçılıq» adlandırıb.
     Məmurlara gəlincə, missiya MSK-da, Ombudsman Aparatında görüşlər keçirməyə müvəffəq olub. «Prezident Administrasiyasının ictimai-siyasi şöbəsinin nümayəndələri ilə görüş əvvəlcədən razılaşdırılmışdı, amma son anda Əli Həsənov imtina etdi», deyə Vinsent bildirib.-