Blinken Gürcüstan hakimiyyətini yeni sanksiyalarla hədələyib

Çərşənbə günü ABŞ dövlət katibi Entoni Blinken işarə edib ki, ABŞ Gürcü Arzusu Partiyasına qarşı əlavə sanksiyalar tətbiq etməyə hazırlaşır. O, hakimiyyətin  etirazçılara qarşı "amansız və əsassız zorakılığını" pisləyib, Turan-ın Vaşinqton müxbiri bildirib.

"ABŞ Gürcü Arzusu Partiyasının Gürcüstan vətəndaşlarına, etirazçılara, KİV nümayəndələrinə və müxalifət xadimlərinə qarşı amansız və əsassız zorakılığını qətiyyətlə pisləyir", - Blinken öz bəyanatında bildirib və "Gürcüstanda demokratik prosesləri və qurumları pozanlara" qarşı sanksiyalar barədə xəbərdarlıq edib.

Bəyanat ABŞ-ın onlarla yüksək vəzifəli şəxsinin Dövlət Departamentini Gürcüstan vətəndaşlarına qarşı zorakılıq və qəddarlıqla məşğul olanları dərhal cəzalandırmağa çağırmasından sonra səslənib.

"Əgər biz indi hərəkətə keçməsək, Gürcü Arzusu zorakılıq və qəddarlıq kampaniyasını gücləndirəcək", - ABŞ Helsinki Komissiyasının rəhbəri Uilson bildirib.

Blinken ABŞ-ın Gürcüstan xalqına öz demokratik səylərində dəstəyini təsdiqləyib:

"ABŞ Gürcüstanın suverenliyinin və ərazi bütövlüyünün qəti tərəfdarı olub və cəsarətli Gürcüstan xalqına və onun avroatlantika səylərinə sadiqliyimiz sarsılmazdır".

Blinken Gürcü Arzusunu repressiv taktikaları, o cümlədən   tənqidçilərinin özbaşına həbsini və fiziki zorakılığı dayandırmağa çağırıb. "Biz xüsusilə hüquq-mühafizə orqanlarının vətəndaşlara ciddi xəsarətlər yetirməsi barədə xəbərlərdən narahatıq.

Dinc toplaşmaq və ifadə azadlığı hüquqlarının həyata keçirilməsinə görə saxlanılan şəxslər dərhal azad edilməli, qanunsuz güc tətbiqinə  məsul şəxslər məsuliyyətə cəlb olunmalıdır", - o əlavə edib.

"Demokratik prosesləri və ya institutları, o cümlədən Gürcüstan vətəndaşlarının dinc toplaşmaq və ifadə azadlığı hüququnu pozanlar məsuliyyətə cəlb edilməlidir. ABŞ bizim sərəncamımızda olan vasitələrdən, o cümlədən əlavə sanksiyalardan istifadə etməyə hazırlaşır", - bəyanatda qeyd olunub.