Rüfət Səfərovun ailəsi hakimiyyətyönlü mediada onun barəsində yayılan çirkin iftiraları təkzib edir

Hüquq müdafiəçisi Rüfət Səfərovun ailəsi bəzi hakimiyyətyönlü KİV-də onu gözdən salmaq üçün  yayılan yalan məlumatları təkzib edib.

"Rufat haqqında, guya ailəmizdəki münaqişə haqqında yalan, böhtan xarakterli məlumatlar yazıblar. Bütün bunlar yalandır. Rüfəti ictimaiyyətin gözündə ləkələmək istəyirlər. Həbsin əsl səbəbi onun hüquq- müdafiə fəaliyyətidir", - Rüfət Səfərovun anası Tahirə Tahirqızı Turan agentliyinə bildirib.

Rüfət Səfərov dekabrın 3-də saxlanılıb. Ona qarşı Cinayət Məcəlləsinin 178.3.2 (dələduzluq, külli miqdarda ziyan vurmaqla törədildikdə), 221.1 (xuliqanlıq) və 127.2.3-cü (qəsdən sağlamlığa az ağır zərər vurma, ümumi təhlükəli üsulla və ya xuliqanlıq niyyəti ilə törədildikdə) maddələrilə ittiham irəli sürülüb.

Rüfət Səfərov ittihamları rədd edib və bildirib ki, hüquq-müdafiə fəaliyyətinə və ABŞ Dövlət Departamentinin mükafatına layiq görüldüynə görə təqib olunur.