BMT-nin İşgəncələr Əleyhinə Komitəsində rəsmi Bakı üçün ağır dinləmələr (YENİLƏNİB)

Noyabrın 11-12-də Cenevrədə BMT-nin İşgəncələr Əleyhinə Komitəsində Azərbaycan üzrə müzakirələr davam edir.

Beynəlxalq hüquq-müdafiə qurumlarındakı mənbələrdən Turan-a məlum olub ki, sessiyada rəsmi Bakı XİN, DİN, MTN, Ədliyyə Nazirliyi, Baş Prokurorluq, Penitensiar Xidmət, Səhiyyə Nazirliyi, parlament və digər qurumların yüksək vəzifəli şəxslərinin iştirakı ilə nümayəndə heyətilə təmsil olunur.

Müxtəlif dövlətlərin nümayəndə heyətlərinin üzvləri Azərbaycan təmsilçilərinə suallar verirlər. Əsasən onlar AİHM-in qərarına zidd olaraq REAL Hərəkatının lideri İlqar Məmmədovun hələ də həbsdə saxlanması, həbsdə olan hüquq müdafiəçiləri Leyla və Arif Yunuslara qarşı təzyiqlər, onlara qarşı zorakılığın tətbiqi ilə bağlı məhkəmə-tibbi ekspertizanın rəyinin yubadılması, Naxçıvan MTN-in təxridxanasında işgəncə nəticəsində Turac Zeynalovun ölməsi barədə soruşurlar.

Bəzi iştirakçılar məhkəmə prosesi zamanı NİDA fəallarına qarşı işgəncəyə dair faktların açıqlanmasından və Leyla Yunusun Bakı təcridxanasında saxlanma şəraitindən şoka düşüblər.

Hələlik Azərbaycan hökumət nümayəndələrinin bu sualları necə cavablandırması ilə bağlı məlumat yoxdur.-16D-

2015 Noyabr 11 (Çərşənbə) 14:24:36

Noyabrın 11-də Cenevrədə BMT-nin İşgəncələr Əleyhinə Komitəsində Azərbaycanda vəziyyət haqqında iki günlük müzakirələr başlayıb.

Yerli mənbələrin məlumatına görə, Azərbaycan nümayəndə heyətinə Leyla və Arif Yunusun vəziyyəti və onlara qarşı qeyri-insani rəftarın səbəbləri, habelə onlara qarşı ittihamların saxtalaşdırılmasının səbəbləri ilə bağlı bir neçə xoşagəlməz sual verilib.

Həmçinin polisin traffikinq və cinsi istismarda iştirakı, vətəndaş cəmiyyəti fəallarının təqibi, QHT-lər sahəsində qanunvericiliyin sərtləşdirilməsi haqqında suallar qaldırılıb. Müzakirələrin yekunlarına görə mətbuat konfransı keçiriləcək.

Bir müddət əvvəl “Human Rights Watch” BMT Komitəsini Azərbaycan hakimiyyətinin hərəkətlərini pisləməyə, onlardan repressiyalara son qoymağı və bütün siyasi məhbusları azad etməyi tələb etməyə çağırıb. -16D-