BMT-nin Korrupsiya ilə Mübarizə Koalisiyasının (UNCAC) icraçı direktoru Qubad İbadoğlunu azad etməyə çağırıb

Bakı/18.12.23/Turan: Dekabrın 11-15-də Atlantada (ABŞ) BMT-nin anti-korrupsiya konfransı keçirilib.

Konfransda BMT-nin Korrupsiya ilə Mübarizə Koalisiyasının (UNCAC) icraçı direktoru Mathias Huter iqtisadçı alim Qubad ibadoğlunu azadlığa buraxmağa çağırıb. Bu barədə Turan-a Qubad İbadoğlunun qardaşı Qalib Toğrul bildirib.

"İcraçı direktor deyib ki, professor Qubad İbadoğlu və xanımı işgəncəyə məruz qalıb və həbs ediliblər. Qubad İbadoğlu korrupsiyaya qarşı mübarizə sahəsində tanınmış şəxsdir. Professorun həyatı təhlükədədir, çünki ona lazım olan tibbi yardlm göstərilmir. Mən Qubad İbadoğlunu dərhal azad etməyə çağırıram", deyə Qalib Toğrul bildirib.

İqtisad elmləri doktoru Qubad İbadoğlu barəsində bu il iyulun 24-də Bakının Nərimanov Rayon Məhkəməsinin qərarı ilə 3 ay 26 gün həbs-qətimkan tədbiri seçilib. Ona qarşı Azərbaycan Cinayət Məcəlləsinin 204.3.1 (satış məqsədi ilə saxta pul və ya xarici valyuta hazırlama, o cümlədən əldə etmə və ya satma - eyni əməllər mütəşəkkil dəstə tərəfindən törədildikdə), 167-3.1 (Dini ekstremist materialları, yəni dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma) maddələri ilə ittiham olunur. İki ittiham üzrə onu 17 ilədək həbs gözləyir.

Azərbaycan Daxili İşlər Nazirliyi Qubad İbadoğlunun Türkiyədə 2016-cı ildə çevriliş cəhdində ittiham olunan, hazırda Amerikada yaşayan Fətullah Gülənin tərəfdarları ilə əlaqədar keçirilən əməliyyat tədbirləri çərçivəsində saxlanıldığını bildirib.

Qubad İbadoğlu ittihamları qəbul etmir və həbsinin siyasi sifariş olduğunu bildirir. Bir sıra ölkələr və beynəlxalq təşkilatlar, o cümlədən ABŞ Dövlət Departamenti, ABŞ senatorları və konqresmenləri İbadoğlunun azad edilməsi üçün çağırışlar edib. 16D