Bolqarıstan Bakıda fəxri konsulluq açacaq: fəaliyyətdə olan baş nazir Kiril Petkovun səfərinin yekunlarına dair

Bakı/22.07.22/Turan: İstefa verən baş nazir Kirill Petkov yeni hökumət formalaşdırmağı və yenidən ona rəhbərlik etməyi planlaşdırır. Onun Bakıya gözlənilməyən səfəri və əldə edilən nəticələr bu məsələdə ona kömək etməlidir. Onun apardığı danışıqlardan və səfərin açıqlanan yekunlarından belə nəticə çıxarmaq olar.

Hökumətin press-relizinə əsasən, Petkov Əliyevlə Bolqarıstanın razılaşdırılmış və Yunanıstandan keçən yeni interkonnektor vasitəsilə tədarük ediləcək həcmdən əlavə Azərbaycan qazı alması mümkünlüyünü müzakirə edib. Bunun təfərrüatını iki ölkənin energetika nazirləri müzakirə edəcək, deyə məlumatda bildirilir. (Hazırkı müqaviləyə əsasən, Azərbaycan Bolqarıstana ildə 1 mlrd. kubmetr qaz tədarük edəcək - Turan).

Petkov Facebook-dakı rəsmi profilində yazıb ki, o, Əliyevlə söhbətində kənd təsərrüfatı, kimyəvi gübrələr, tikinti, müdafiə sənayesi və informasiya texnologiyaları sahəsində bir çox ümumi iqtisadi imkanlar tapıb.

"Yaxın gələcəkdə Bolqarıstan Azərbaycanda fəxri konsulluq da açacaq. Ölkələrimiz arasında çoxillik dostluğun strateji iqtisadi layihələr və energetikanın əhəmiyyətli dərəcədə şaxələndirilməsi üçün əsl körpüyə çevrilməsinin vaxtı çatıb", deyə Peskov yazıb.

Bolqarıstan hökumətinin mətbuat xidməti həmçinin Petrokun Bakıya iki günlük səfəri zamanı Azərbaycan biznesinin Bolqarıstan şirkətləri ilə ticari əlaqələri olan nümayəndələri ilə görüş keçirdiyini bildirib. 02D