Brüsseldə Xocalı soyqırımının 27-ci ildönümünə həsr olunmuş mitinq

Bakı/24.02.19/Turan: Şənbə günü Brüsseldə Xocalı soyqırımının 27-ci ildönümünə həsr olunmuş mitinq keçirilib. Aksiya Avropanın Azərbaycan diasporası birlikləri tərəfindən təşkil edilib. Aksiya iştirakçıları Xocalı soyqırımını tanımağa və pisləməyə çağırıblar.

Azərbaycanın Diaspora Təşkilatları ilə İş üzrə Dövlət Komitəsi bildirib ki, mitinqdə Avropa ölkələrindən 800-ə yaxın azərbaycanlı, habelə Azərbaycanla dost olan xarici diaspora təşkilatlarının nümayəndələri iştirak ediblər.

Azərbaycan diaspora təşkilatlarının nümayəndələri ingilis, alman, fransız, italyan, rumın dillərində və digər dillərdə "Xocalıya ədalət!", "Azərbaycan sülh istəyir!", "Günahsız körpələri öldürməyin", "Erməni yalanına dur de!", "Qarabağa qayıtmaq istəyirik!", "Dilqəmə və Şahbaza azadlıq!" şüarları ilə çıxış ediblər. Onlar öz çağırışlarını Avropa Parlamentinə və beynəlxalq təşkilatlara ünvanlayıblar.

Mitinq iştirakçıları 27 il əvvəl Ermənistanın törətdiyi Xocalı soyqırımına siyasi-hüquqi qiymət veriblər. Onlar məcburi köçkünlərin qayıda bilməsi üçün işğal edilmiş Azərbaycan ərazilərindən qoşunlarını çıxarması, habelə bütün Azərbaycanlı əsir və girovların, o cümlədən Dilqəm Əsgərov və Şahbaz Quliyevin azad edilməsi məqsədilə Ermənistana təzyiq göstərilməsini tələb edib.

Aksiyanın sonunda Avropa Parlamentinə ünvanlanmış müraciət qəbul edilib. Müraciət təxminən 200 ünvana, o cümlədən Avropa Palamentinin, beynəlxalq təşkilatların, səfirliklərin məsul şəxslərinə və bir çox dövlət və hökumət başçılarına göndərilib.

Mitinq zamanı yerli sakinlərə Ermənistanın işğalçı siyasəti nəticəsində Azərbaycanın mənəvi və maddi itkiləri haqqında kitabçalar paylanıb.

Mitinq xarici KİV-lər vasitəsilə, həmçinin sosial şəbəkələrdə işıqlandırılıb.

Azərbaycanın Dağlıq Qarabağda yerləşən Xocalı şəhəri fevralın 25-dən 26-na keçən gecə keçmiş Sovet Ordusunun 366-cı alayının dəstəyi ilə Ermənistan silahlı birləşmələri tərəfindən işğal edilib. Şəhərin işğalı mülki əhalinin kütləvi qətlləri ilə müşaiyət olunub. Ümumilikdə 600-dən çox insan öldürülüb. -06D-