Cəmil Həsənli: Əmək qabiliyyətli olduğumu həkim ekspert komissiyası təsdiq edib

Milli Şuranın prezidentliyə namizədi Cəmil Həsənli bu gün RATİ-nin media mərkəzində keçirdiyi mətbuat konfransında iqtidarda olan Yeni Azərbaycan Partiyasının prezidentliyə namizədinin səlahiyyətli nümayəndəsi Əli Əhmədovun onun əlilliyi ilə bağlı irəli sürdüyü mülahizəyə cavab verib. 

Həsənli 3-cü qrup əlilliyi olduğunu təsdiq edib. Onun dediyinə görə, bu  qrup əlillərə işləməyə icazə verilir. “Hələ 1987-ci ildə Moskvada Svyatoslav Fyodorovun Göz institutunda Fyodorovun özü sol gözümə süni büllur təbəqə yerləşdirib. 10 ildən sonra həmin təbəqə yenisi ilə əvəz olunmalı idi. Bu illərdə məndə şəkər ehtimalı yarandı və əməliyyat baş tutmadı. Sonra mən Zərifə Əliyeva adına Oftolmologiya Mərkəzində müalicə aldım və əlillik dərəcəsi verdilər. Sağ gözümün görmə qabiliyyəti çox yaxşıdır, sol gözümdə müəyyən problem var. Həkim ekspert komissiyası əmək qabiliyyətli olduğumu təsdiq edib”. 

O, həmçinin Mərkəzi Seçki Komissiyasının sənədlərini yoxladığını və əmək qabiliyyətli olduğu üçün namizədliyini təsdiq etdiyini bildirib. 

“Bu mənim sənədlərimdir. Televiziyanın efirində də bu sənədləri təqdim etdim. İndi Yeni Azərbaycan Partiyası namizədi İlham Əliyevin ailəsinin Dubay mülkləri, ölkədən çıxarılan böyük miqdarda pullar, ofşor şirkətləri barədə sənədləri təqdim etməlidir”, deyə Həsənli  qeyd edib. -03C-