Ceyhun Bayramov İranın xarici işlər naziri vəzifəsinin icraçısı ilə telefonla danışıb

Mayın 21-də Azərbaycanın xarici işlər naziri Ceyhun Bayramov və İranın xarici işlər naziri vəzifəsini icra edə Əli Bağeri Kani telefonla danışıblar.

Azərbaycan Xarici İşlər Nazirliyindən bildiriblər ki, Ceyhun Bayramov vertolyot qəzası zamanı İran prezidentinin, xarici işlər nazirinin və digər rəsmi şəxslərin həlak olması ilə əlaqədar dərin hüznlə başsağlığı verib.

Telefon danışığı zamanı mayın 19-da iki ölkə liderlərinin görüşündə əldə edilmiş razılaşmaların yerinə yetirilməsinin, o cümlədən "strateji layihələrin" işə salınmasının, nəqliyyat, iqtisadiyyat və energetika sahələrində planların həyata keçirilməsi üçün birgə səylərin davam etdirilməsinin vacibliyi qeyd olunub.

Həmçinin Azərbaycanın İrandakı səfirliyinin işinin bərpa olunması məsələsinə toxunulub.

Kani Azərbaycan prezidenti İlham Əliyevin başsağlığı üçün səfirliyə gəlməsinə, xarici işlər naziri və Azərbaycanın digər rəsmi şəxslərinin başsağlığı məktubları göndərməsinə görə dərin minnətdarlığını bildirib.

Tehranda bu, “yüksək hörmət əlaməti”  kimi qiymətləndirilir.