Çoxsaylı müzakirələrə baxmayaraq, orduda durum daha da pisləşir

Ölkənin bir sıra ictimai-siyasi qurumları cümə günü Klassık Xalq Cəbhəsi Partiyasının qərargahında “Silahlı qüvvələrin problemləri” mövzusunda dinləmələr keçirib.

Silahlı qüvvələrdəki durum son 10 ildə daim diqqət mərkəzində olub. Bu sahədəki neqativlər ictimai qurumlar, media tərəfindən daim tənqid olunsa da, bu sahə rəhbərləri bundan nəticə çıxarmayıblar. Ona görə də silahlı qüvvələrdə ölüm halları artmaqda davam edib. Belə kritik duruma baxmayaraq, silahlı qüvvələrə rəhbərlik edənlər kardinal dəyişikliyə səbəb olan addımlar atmayıblar. Əslinə qalsa, bugünki tədbir son 10 ildə mövcud olan neqativlərin silahlı qüvvələrin rəhbərlərinin bir daha yadlarına salınması məqsədi daşıyırdı. 

“Din, Demokratiya və İnsan Haqları” birliyinin rəhbəri Aytəkin İmranlı ordudakı durumu acınacaqlı adlandırıb. Bu qurumda bədbəxt hadisələrin səngimədiyi, bir hadisə qurtarmamış yeni bir hadisənin baş verdiyi vurğulanıb. Büdcədən müdafiə sektoruna ən çox maliyyə ayrılsa da, bu, adı çəkilən sahədə mütərəqqi dəyişkliklərə səbəb olmur. Hansısa növbəti bədbəxt hadisə baş verdikdən sonra kiminsə rütbəsinin alınması, vəzifəsinin endirilməsi “kosmetik dəyişklik” adlandırılıb. Ordu insan haqlarının kütləvi şəkildə pozulduğu qurumlardan biri sayılıb. Bu qurumda zorakılıqların artdığı nəzərə çatdırılıb. Əsgərlərin baxımsızlıqdan ölməsi kimi halların olduğu iddia edilib. Bütün bu halları aradan qaldırmağın yolu kimi ictimai institutların təhqiqat qrupu yaratması təklif edilib. 

Bundan əlavə, silahlı qüvvələrə ictimai nəzarətin təşkil olunması zərurəti səsləndirilib. Bütün neqativləri aradan qaldırmaq üçün isə orduda köklü islahatların başlaması yeganə çıxış yolu sayılıb. Müdafiə Nazirliyinə mülki şəxsin rəhbərlik etməsi vacib amillərdən biri hesab edilib. Bir sıra natiqlər ölkənin müharibə durumunda olmasını əsas gətirərək, müdafiə nazirinin mülki şəxs olması təklifini əsassısz adlandırıb. Peşəkar ordu sisteminə keçilməsi də orduda neqativləri aradan qaldırmaq üçün təkliflərdən biri olub. Tərtərin keçmiş icra başçısı Sərdar Həmidov orduda kadrlara dəyər verilməməsini problermlərin kökü sayıb. İndi işğalda olan rayonları vaxtilə qorumağa məsul olan rəhbərləri Bakıya qaçmaqda, Bakıda qəhrəmanlıqdan dəm vurmaqda, hektarlarla torpaq sahələrinə malik olmaqda ittiham edib. 

Ehtiyatda olan Zabitlər Birliyinin rəhbəri Yaşar Cəfərli ordunun statusunun bəlli olmadığını deyib. Belə ki, ordunun dövlətə, yoxsa iqtidara tabe olması bəlli deyil. Ordu dövlətə məxsus isə, o zaman hər- hansı seçki prosesində iştirak etməməlidir. Ordu iqtidara tabedirsə, o zaman vahid komandanlıq olmamalıdır. Çünki, vahid komandanlıq olan yerdə bu qüvvə iqtidarın maraqlarına tabe edilir. Digər tərəfdən, bütün qoşun növləri komandanları olduğu halda quru qoşunları komandanı yoxdur. 

Orduya ayrılan vəsaitlərin xərclənməsinə ictimai nəzarət olmadığı üçün vəsaitlərin necə və hara xərcləndiyi məlum deyil. Bütün nazirliklərin sturkturları Əsasnamə ilə müəyyən edildiyi halda, Müdafiə Nazirliyinin bu günə kimi Əsasnaməsinin olmadığı qeyd edilib. “Ordudakı problemlərin hamısı ordu rəhbərliyinin yaratdığı idarəetmə sistemindən qaynaqlanır”, - deyə Y.Cəfərli problemlərin kökünü göstərib. Cəmiyyət orduda baş verən proseslərə biganəlikdə qınanılıb. 

Şəhidə ehtiram olmadığı deyilib və şəhidin dəfn olunması mərasimilə bağlı indiyə kimi qanun qəbul olunmadığı vurğulanıb. 

Tədbirin sonunda səsləndirilən təkliflərlə bağlı Prezident Administrasiyasına müraciət hazırlanması qərara alınıb. -05C-