Cümə axşamı Bayden və Harris Ağ Evdə Zelenskini qəbul edəcək

Gələn cümə axşamı ABŞ prezidenti Co Bayden və vitse-prezident, eyni zamanda Demokratlar Partiyasından prezident vəzifəsinə namizəd Kamala Harris qələbə planını və müharibənin cari vəziyyətini müzakirə etmək üçün Ağ Evdə Ukrayna prezidenti Vladimir Zelenskini ayrı-ayrılıqda qəbul edəcəklər, bu barədə Turan-ın Vaşinqtondakı müxbiri xəbər verib.

Ağ Evin bəyanatında bildirilib ki, Bayden və Harris "Ukrayna bu müharibədə qələbə qazanana qədər ona dəstək məsələsində sarsılmaz qətiyyətlərini vurğulayacaqlar".

Zelenski Vaşinqtonda Konqres liderləri ilə də görüşəcək. Diplomatik mənbələrdən Turan-a verilən məlumata görə, onun keçmiş prezident və hazırda Respublikaçılar Partiyasından namizəd Donald Trampla görüşü məsələsi hələ təsdiq edilməyib.

Zelenski gələn həftə boyunca ABŞ-da səfərdə olacaq, BMT Baş Assambleyasının 79-cu sessiyasında iştirak edəcək, çərşənbə günü dünya liderləri qarşısında nitqlə çıxış edəcək, həmçinin BMT Təhlükəsizlik Şurasının Ukrayna ilə bağlı yüksək səviyyəli brifinqində iştirak edəcək. Bu brifinqdə Rusiya nümayəndəsi Sergey Lavrov da iştirak edəcək.

Dövlət Departamentinin nümayəndəsi Metyu Miller gündəlik brifinqdə bildirib ki, Təhlükəsizlik Şurasının tədbiri zamanı dövlət katibi Entoni Blinken Rusiyanın Ukraynaya qarşı müharibəsinin BMT Nizamnaməsinin fundamental pozuntusu olduğunu və sabit və açıq beynəlxalq sistemə xələl gətirdiyini vurğulayacaq. Orada Blinken və Lavrovun hər hansı qarşılıqlı əlaqəsi gözlənilmir, deyə Miller Turan-ın müxbirinə bildirib.