ÇXR koronavirusla mübarizədə Azərbaycana yardım etməyə hazır olduğunu bildirib

Bakı/29.03.20/Turan: Çin Xalq Respublikasının (ÇXR) dövlət müşaviri, Çinin xarici işlər naziri Van İ Azərbaycanın xarici işlər naziri Elmar Məmmədyarova koronavirus pandemiyası ilə əlaqədar teleqram vurub, bu barədə martın 28-də Azərbaycan XİN-nin mətbuat xidməti məlumat verib.

Van İ ÇXR adından koronavirusla mübarizədə dəstəyə görə Azərbaycana minnətdarlığını bildirib.

Turan-ın verdiyi məlumata görə, fevralın əvvəlində prezident İlham Əliyev Çində insanların koronavirusdan vəfatı ilə əlaqədar Çinə başsağlığı verib və köməyə hazır olduğunu ifadə edib. Bir qədər sonra Sumqayıt şəhər icra hakimiyyəti Minyan şəhərinə 100 min tibbi baş örtüyü, 40 min maska, 100 min steril əlçək, 100 litr spirt, 100 min baxil, beş koliqram xloramin tozu və 1850 xloramin həbi göndərib.

“Çin imkanları daxilində Azərbaycana yardım etməyə, epidemioloji situasiya, pandemiyanın qarşısının alınması və xəstəliyə nəzarət təcrübəsinin mübadiləsi, həmçinin tibbi müalicə ilə bağlı sıx təmas qurmağa hazırdır. Biz inanırıq ki, Azərbaycan tərəfi qısa müddətdə yoluxma təhlükəsini aradan qaldıracaq və Çinlə Azərbaycan arasında münasibətlər inkişaf üçün yeni və daha böyük impuls alacaq”, - deyə Van İ-nin teleqramında deyilir.

Turan agentliyinin məlumatına görə, Azərbaycanın əsasən də pandemiya ilə mübarizədə dövlət idarəçiliyi məsələsində, həmçinin vaksinasiya məsələsində Çinin kömək və təcrübəsinə ehtiyacı var.

Azərbaycan bazarı həmçinin Çindən qeyri-ərzaq və sənaye məhsullarının tədarükünün dayandırılması ilə bağlı ciddi problem yaşayır və onların bərpasında ehtiyac duyur.—0—