Dəyirmi masa iştirakçısı: Qarabağ problemini danışıqlarla həll etmək olmaz

Azərbaycan ATƏT-in Minsk qrupu çərçivəsində danışıqlar prosesindən imtina etməlidir, belə ki, bu proses problemin həllinə deyil, uzadılmasına yönəlib. Azərbaycanın işğal olunmuş ərazilərinin azad edilməsinin yeganə yolu hərb yoludur. Avqustun 8-də “Azərbaycanın işğal edilmiş ərazilərində tarix və mədəniyyət abidələrinin mühafizəsi təşkilatı” QHT-nin keçirdiyi dəyirmi masada səslənən əsas fikir belə olub.

QHT sədri Faiq İsmayılovun fikrincə, ATƏT-in Minsk qrupu və ona həmsədr ölkələr münaqişə ətrafında vəziyyəti saxlayaraq, DQR-in “beynəlxalq hüquq subyekti” kimi tanınması üçün şərait yaradılmasına imkan yaradır.

Atəşkəs rejimi şəraitində işğalçılar ələ keçirdikləri ərazilərdə özlərini rahat hiss edirlər və təcavüzün nəticələrini möhkəmləndirməyə çalışırlar.

Belə ki, Dağlıq Qarabağda və Laçında sosial-iqtisadi infrastrukturun inkişafı üzrə tədbirlər həyata keçirilir, bütün bunların böyük hissəsi ATƏT MQ-nin həmsədr olan ölkələrin maliyyə yardımı hesabına baş verir.

Münaqişənin həllinin gecikdirilməsi bu torpaqların qaytarılması zərurətini zəiflədir. Məcburi köçkünlər arasında heç vaxt bu ərazilərdə yaşamamış yeni nəsil böyüyür.

Dəyirmi masa iştirakçılarının ortaq fikrinə görə, ölkənin bütün resursları və ictimai fikir işğal edilmiş ərazilərin azad edilməsinə hazırlıq üçün səfərbər edilməlidir. Azərbaycan cəbhə xəttində düşmənə rahatlıq verməməlidir və dünya hiss etməlidir ki, Azərbaycan xalqı heç vaxt ərazilərinin itirilməsi ilə barışmayacaq.

Dəyirmi masa iştirakçıları həmçinin Azərbaycanda hərbi-vətənpərvərlik işinin zəif olmasını tənqidə məruz qoyublar. Əsas magistral yollar boyunca və ümumiyyətlə insanların çox olduğu heç bir yerdə vətənpərvərlik mövzusunda plakat yoxdur, deyə tarix üzrə fəlsəfə doktoru Vaqif Abuşov bildirib.

Dəyirmi masada həmçinin bildirilib ki, “Azərbaycanın işğal edilmiş ərazilərində tarix və mədəniyyət abidələrinin mühafizəsi təşkilatı” “İşğal edilmiş ərazilərdə vəziyyət haqqında” qanun layihəsi hazırlayıb. Bu sənəd işğal edilmiş ərazilərdə Azərbaycanın suveren hüquqlarının müdafiəsi, ölkə hakimiyyətinin icazəsi olmadan bu ərazilərə səfərlərin qadağan edilməsi, Azərbaycanın mədəni irsinin və Azərbaycan toponimlərinin müdafiəsi üzrə beynəlxalq hüquq mexanizmlərindən istifadə ilə bağlı məsələləri tənzimləyir. İsmayılov qeyd edib ki, sentyabrda Şura sənədin ictimai müzakirələrini təşkil edəcək.

QHT həmçinin işğalçıların daş üzərində naxış ustası, Laçın rayonunun Mirik kənd sakini Rəhim Murtuzovun yaratdığı incəsənət əsərlərinin işğalçılar tərəfindən mənimsənilməsi ilə bağlı Avropa İnsan Hüquqları Məhkəməsinə iddia hazırlayır. Belə ki, onun yaratdığı ədəbi qəhrəman Fərhadın və sərkərdə Cavanşirin barelyefləri işğal zamanı ustanın həyətində qalıb. Dəyirmi masa iştirakçıları “Laçın” rayon qəzetinin 1988-ci ildə dərc edilmiş sayını nümayiş etdirib, burada həmin barelyeflərin şəkli əks olunub.

İndi işğalçılar bu əsərləri əcnəbilərə erməni mədəniyyətinin predmetləri kimi təqdim edirlər. Şikayət yaxın günlərdə Strasburqa göndəriləcək. -06C-