DİN keçmiş deputat barəsində araşdırma aparıldığı haqqında məlumatları təsdiq etməyib

Bakı/24.06.23/Turan: Milli Məclisin keçmiş deputatı, sahibkar Nazim Bəydəmirli sosial şəbəkələrdə və mətbuatda yayılan hüquq-mühafizə orqanlarının onun Söyüdlü kəndindəki etirazların təşkilində iştirakını araşdırması haqqında məlumatlarla bağlı şərh verib.

"İki gündür mənim adımı Gədəbəy rayonunun Söyüdlü kəndində baş verən hadisələrdə hallandıraraq müxtəlif şaiyələr yayırlar. İndi də guya BMCMİ-də işgəncə altında Soyudlü kəndindən Bakıya gətirilmiş həbs edilənlərdən mənə qarşı ifadə alınması haqqında "xəbərlər" məqsədli tirajlanır. Bu "xəbərlər" yaxınlarımı, qohumlarımı, dostlarımı, ailə üzvlərimi narahat etdiyindən açıqlama verməyinizi (hüquq-mühafizə orqanlarından) xahiş edirəm", deyə Bəydəmirli facebook-da yazıb.

Turan-ın Bəydəmirlinin mesajı ilə bağlı sorğusuna cavabda DİN-in mətbuat xidmətinin şöbə müdiri Elşad Hacıyev bildirib ki, "Söyüdlü kəndində baş vermiş hadisə ilə bağlı araşdırmalar davam edir və burada naharahatlıq doğuran hər hansı hal yoxdur". 

Saxlanılan bəzi şəxslərdən Bəydəmirlinin əleyhinə ifadə alınması ilə bağı məsələyə gəlincə, Hacıyev bunu "deyən şəxsin şəxsi mülahizəsi" adlandırıb. 06D