Donald Trampın İlham Əliyevə müraciəti

Bakı/27.04.18 /Turan: ABŞ prezidenti Donald Tramp Azərbaycan prezidenti İlham Əliyevə məktub göndərib.

İ.Əliyevin saytında dərc edilən müraciətdə deyilir: "Hörmətli cənab Prezident, mən Amerika və Azərbaycan xalqları üçün qarşılıqlı maraq doğuran bir çox sahələrdə Sizinlə birgə işləmək əzmindəyəm.

Biz Sizinlə birlikdə terrorçuluğun məğlub edilməsində, yeni iş yerlərinin yaradılmasında və Avropanın enerji təhlükəsizliyinin yaxşılaşdırılmasında tərəqqi əldə edə bilərik. Korrupsiyaya qarşı mübarizədə və Dağlıq Qarabağ münaqişəsinin sülh yolu ilə həllində irəliləyiş bu səylərə töhfə verəcəkdir.

Sizə və Azərbaycan xalqına ən xoş arzularımı bildirirəm".

Məlumatda Trampın Əliyevə məktubu hansı məsələ ilə bağlı göndərdiyi dəqiqləşdirilmir, amma bunun Əliyevin yenidən prezident vəzifəsinə seçilməsi ilə bağlı olduğunu ehtimal etmək olar.

Həmçinin, mətndə demokratiya və insan hüquqları sahəsində əməkdaşlıqdan bəhs edilmir.

Bütün əvvəlki illərdə ABŞ Azərbaycanla əməkdaşlığın eyni dərəcədə üç strateji istiqamətə - təhlükəsizlik, energetika və demokratiyaya əsaslandığını bəyan edirdi. -06D-