Dövlət Departamenti: "Xarici agentlər haqqında" qanun Gürcüstanı Avropa yolundan döndərir

"Xarici agentlər haqqında" mübahisəli qanun parlamentin təsdiqinə verilməzdən bir neçə gün əvvəl ABŞ bununla əlaqədar "dərin narahatlığını"  Gürcüstanın hakim partiyasına bildirib.

Vətəndaş cəmiyyətinin maliyyələşdirilməsi qaydalarını sərtləşdirəcək qanun layihəsi bazar ertəsi birinci mərhələdən keçib və yaxın həftələrdə baxılmaq üçün parlament komitəsinə təqdim ediləcək.

"Bu qanun layihəsi qəbul olunarsa, Gürcüstan vətəndaşlarının həyatının yaxşılaşdırılması üzərində çalışan vətəndaş cəmiyyəti təşkilatlarına ziyan vuracağından çox narahatıq", - brifinq zamanı Dövlət Departamentinin rəsmi nümayəndəsi Metyu Miller Turan-ın suallarını cavablandırarkən deyib.

"Bu, Gürcüstanı Avropa yolundan döndərə bilər və biz qanunun müstəqil kütləvi informasiya vasitələrinə mane ola biləcəyindən narahatıq", - o əlavə edib.

Eyni zamanda, Miller qanun layihəsi qəbul edildiyi təqdirdə Vaşinqtonun ata biləcəyi hər hansı potensial addım barədə şərh verməkdən çəkinib.

«Hazırda bu qanun layihəsinin bizi narahat etdiyini açıq şəkildə bildiririk. Qəbul ediləcəyi təqdirdə, nə edə biləcəyimizə gəlincə, yenilikləri izləyin", - o cavab verib.