Dövlət Himni və Gerbi dəyişməyəcək

Bakı/16.04.19/Turan: Aprelin 15-də prezident İlham Əliyev Dövlət Himnindən və Dövlət Gerbindən İstifadə Qaydaları haqqında qanunları imzalayıb. Bu qanunlarla Azərbaycan Respublikasının Dövlət Himninin ifa edilməsi, oxunması, dinlənilməsi və Azərbaycan Respublikasının Dövlət Himnindən istifadə qaydaları, həmçinin Azərbaycan Respublikasının Dövlət Gerbindən istifadə qaydalarını müəyyən edilir. Qaydalarda Dövlət Gerbinə və Himninə hörmət, müəlliflik hüququ, Dövlət Gerbinin qabarıq təsvirinin vurulduğu yerlər, Dövlət Himninin mütləq ifa edildiyi hallar və həmin hallarda ifa edilməsinə, oxunmasına və dinlənilməsinə dair tələblərvə s. müddəalar öz əksini tapıb.

İlk milli himn və gerb haqqında qərar 1920-ci il yanvarın 30-da Azərbaycan Xalq Cümhuriyyətinin Nazirlər Şurası tərəfindən qəbul edilib, lakin 1920-ci ildə Azərbaycanın Sovet Rusiyası qoşunları tərəfindən işğalı Azərbaycanın milli himninin və gerbin qəbul olunmasına imkan verməyib. Yalnız 72 il sonra - 1992-ci ildə Milli Məclis "Azərbaycan Respublikasının Dövlət Himni haqqında" Qanun qəbul edib. Qanuna əsasən, bəstəkar Üzeyir Hacıbəyov və şair Əhməd Cavad tərəfindən tərtib edilmiş "Azərbaycan marşı" Azərbaycan Respublikasının Dövlət Himni kimi təsdiq edilib. Azərbaycan SSR qurulduqdan sonra uzun bir müddət Konstitusiyada dövlət himni barədə maddə olmayıb. 1945-ci ildə qəbul edilən Azərbaycan SSR-in Dövlət himninin bəstəkarı yenidən Üzeyir Hacıbəyov olur. Himnin sözləri isə Səməd Vurğun və Süleyman Rüstəmə məxsus idi.

Azərbaycan Sovet Sosialist Respublikasının gerbi 1937-ci ildə təsis olunub və müstəqillik bərpa olunandan sonra qüvvəsini itirib. "Azərbaycan Respublikasının Dövlət gerbi haqqında" Konstitusiya Qanunu isə 1993-cü ildə qəbul olunub və 1919-1920-ci illərdə hazırlanmış gerb layihəsini müəyyən düzəliş və təkmilləşdirmələrlə Azərbaycan Respublikasının Dövlət gerbi kimi təsdiq edilib.

Son vaxtlar himnlə gerbin dəyişdirilməsi haqqında geniş müzakirələr başlayıb. Keçən il bir neçə dəfə Dövlət himninin dəyişdirilməsi haqqında təkliflər səsləndirilib. Bakı Musiqi Akademiyasının rektoru Fərhad Bədəlbəyli himnin musiqisini minor notlardan major notlara interpretasiyasını ya da Üzeyir Hacıbəyovun digər musiqi ilə əvəzlənməsini təklif edib. Həmin ilin noyabrında isə Milli Məclis deputatı Tahir Kərimli himnin davamlılığının qısaldılmasını və qəmli notların yığışdırılmasını təklif edib. Parlamentin digər deputatı Rafael Hüseynov isə "Gerb" sözündə düzəliş edilməsini təklif edərək, "gerb" sözünün "herb" kimi yazılması barədə təklif irəli sürüb. Bütün bu təkliflər cəmiyyətdə birmənalı qarşılanmayıb və ciddi etiraza səbəb olub.

Görünür, qanunların qəbul edilməsindən sonra Dövlət himnində və gerbində heç bir dəyişiklik gözlənilmir və son vaxtlar gedən müzakirələrə və gerblə himninin dəyişdirilməsi haqqında mübahisələrə son qoyulacaq. -0-