Dövlət şirkətlərində islahatlar kadr təmizliyi olmadan ötüşməyəcək

Bakı/27.02.21/Turan: Azərbaycan prezidenti İlham Əliyev fevralın 26-da keçirilən mətbuat konfransında sağlamlaşdırılma məqsədilə "Azərbaycan İnvestisiya Holdinqi"nin (AİH) idarəçiliyinə verilmiş dövlət şirkətlərinin gələcəyinə toxunub.

"Dövlət şirkətlərində idarəçilik sistemi axsayır. O, müasir tələblərə cavab vermir. Bu, ləngidici amildir və büdcədən vəsaitlərin sovrulması üsuludur. Bu gün dövlət şirkətləri bir çox məsələlərdə dövlətin boynunda ağır yükdür… Əgər bu gün fərz etsək ki, bizim bütün dövlət şirkətlərimiz bir növ özəl Qərb şirkətlərinin korporativ idarəçilik üsulu ilə işləyir, o halda onlar, sadəcə, ərazilərin bərpası üçün lazım olan layihələrə sərmayə yatırmayacaqlar. Buna görə də bu mərhələdə məqsəd dövlət şirkətlərinin korporativ idarəçiliyini beynəlxalq normalara uyğun şəklə salmaq, lazımi nəzarəti təmin etməkdir", deyə prezident Reuters-in iri dövlət şirkətlərinin özəlləşdirilməsi mümkünlüyü haqqında sualına cavabda bildirib.

   "Hətta vergi ödəyicisi olan Dövlət Neft Şirkəti də dövlətdən pul alır. Bu yaxınlaradək qazlaşdırma üçün büdcədən pul alırdı. Belə iş olarmı?", deyə dövlət başçısı bildirib.

Onun sözlərinə görə, xüsusən Azərbaycanın azad olunmuş əraziləri bərpa etməli və bu işləri maliyyələşdirməli olduğu bir dövrdə bu, yolverilməzdir.

Bununla yanaşı, Əliyev qeyd edib ki, 2021-ci ildə SOCAR və digər dövlət müəssisələri özəlləşdirilməyəcək, belə ki, onlar yaxşılaşdırılmalıdır.

"Kim yeni qaydada vicdanla, şəffaf işləməyi bacarmırsa və ya bunu istəmirsə, o, məsuliyyətə cəlb ediləcək, özü də təkcə inzibati məsuliyyətə yox", deyə dövlət başçısı vurğulayıb.

Qeyd edək ki, SOCAR-ın xalis gəliri 2018-ci ildə 1,2 milyard manat (706 milyon dollar) təşkil etdiyi halda, 2019-cu ildə 46 faiz azalaraq, 651 milyon manat (383 milyon dollar) təşkil edib. 2020-ci ildə koronavirus pandemiyası və dünyada karbohidrogen qiymətlərinin aşağı olması ilə əlaqədar onun xalis gəliri daha da az olacaq, amma maliyyə hesabatı qaydalarına uyğun olaraq, SOCAR bu göstəricini 2021-ci il yayın sonunda açıqlayacaq.

SOCAR-ın uzunmüddətli kreditlər üzrə borcları 11,4 mlrd. manat təşkil edir, bir halda ki, Azərbaycanın ümumi xarici borcu təqribən 15 mlrd. manata bərabərdir.

Qazlaşdırmaya gəlincə, təkcə 2020-ci ildə dövlət büdcəsindən qazlaşdırmaya təxminən 130 mln. manat xərclənib. 2019-cu ildə bu göstərici 53,5 mln. manat təşkil edib. Amma qazlaşdırma səviyyəsi hələ də 100%-ə çatmayıb.

"Azəriqaz"ın məlumatına görə, SOCAR 2009-2019-cu illərdə 2349 yaşayış məntəqəsini qazlaşdırıb, ümumilikdə 51915 min km uzunluğunda yeni qaz kəməri çəkib, 9 742 min km uzunluğunda qaz kəmərini təmir edib.

Hazırda əhali arasında qaz abunəçilərinin ümumi sayı 2,2 mln. nəfər təşkil edir.

Qeyd edək ki, 2021-ci ildə SOCAR rəhbərliyi peşəkar hazırlıq testindən keçəcək (dövlət başçısının AİH-in və SOCAR Müşahidə Şurasının yaradılması haqqında sənədlərdə əksini tapan qərarına əsasən). Odur ki, kadr dəyişiklikləri çox da uzaqda deyil. -0-