Media-icmal 27.02.21

“Yenisabah.az” saytı “Rusiya hərbiçiləri Qarabağı tərk edəcək” sərlövhəli məqalədə bəhs olunan məsələni politoloq Elxan Şahinoğlu ilə şərh edir.

Müəllif deyir ki, fevralın 26-da dövlət baçısı İlham Əliyev 4 saatdan çox davam edən mətbuat konfransında bir çox məsələlərlə yanaşı, Dağlıq Qarabağda yerləşən Rusiya hərbiçilərinin bölgədəki fəaliyyət dövrünə də toxunub və rəsmi Bakının 5 ildən sonra vəziyyətə uyğun qərar verə biləcəyini vurğulayıb.

Politoloq Elxan Şahinoğlu vəziyyəti şərh edərək deyir ki, Rusiya hərbiçiləri Dağlıq Qarabağı 5 ildən sonra tərk edə bilərlər.

Onun sözlərinə görə, Azərbaycan ictimaiyyəti Rusiya hərbiçilərinin Qarabağda uzun müddət qalması düşüncəsində deyil, həm də rəsmi Bakı da etiraf edir ki, sülhməramlılarla bağlı bəzən suallar yaranır.

Politoloq vurğulayır ki, Azərbaycan rəhbərliyi Rusiyanın Ermənistanı pulsuz olaraq silahlandırmasına, erməni ordusunu yenidən qurmaq istəməsinə narazılıq ifadə edib. Rəsmi Bakı həm də hesab edir ki, Rusiya Ermənistana verdiyi “İskəndər” raketlərini geri almalıdır.

E.Şahinoğlu deyib ki, daha bir məsələ Türkiyənin Ermənisatanla sərhədləri açmasıdır, amma Ermənistanın Türkiyəyə ərazi iddiaları olması bunu mümkünsüz kimi göstərir.

E.Şahinoğluna görə, daha bir məsələ Azərbaycanın Qarabağda bəzi ərazilərə hələ də qayıda bilməməsidir, amma dövlət başçısı bu ərazilərin danışıqlar yolu ilə azad olunacağını bildirir.    

Politoloq hesab edir ki, əsas hədəflər Azərbaycanın zamandan düzgün istifadə edərək Laçın dəhlizi üzərindən sərhədi nəzarətə götürməsi, Dağlıq Qarabağda seprataçıların tərksilah olunmasıdır.  

“Yeniavaz.com” saytı “Martda məktəblər yenidən bağlana bilər – TN yanında İctimai Şuranın məsul katibi” sərlövhəli məqalədə bəhs olunan məsələni Aspirant və Magistrlər Cəmiyyətinin sədri, fizika-riyaziyyat elmləri üzrə fəlsəfə doktoru İlqar Orucovla müzakirə edir.

Müəllif deyir ki, Nazirlər Kabineti xüsusi karantin dövründə təhsil, təlim-tərbiyə prosesinin müvəqqəti qaydalarını açıqlayaraq, Azərbaycanda orta məktəblər qismən də olsa əyani tədris formatında fəaliyyətini bərpa edib.

Müəllifə görə, buna baxmayaraq, narahatlıq yenə də mövcuddur, məktəblərdə yoluxma halları müşahidə olunmaqdadır, yoluxma aşkarlanan məktəblərdə tədris, təlim-tərbiyə prosesi dayandırılıb.

İ.Orucov isə deyir ki, bu, gözlənilən idi, pandemiya davam etdiyi müddətdə təhsil müəssisələrində yoluxma halları istisna deyildi: “Hansı məktəblərdə yoluxma varsa, ona uyğun qərar qəbul ediləcək. Bağlanan məktəblərin sayı arta bilər, bu, istisna deyil”, deyə cəmiyyət sədri bildirir.

İ.Orucov mart ayında məktəblərin bağlana bilməsi iddiaları ilə bağlı bunun vəziyyətdən asılı olacağını söyləyir. Onun fikrincə, hazırda buna birmənalı cavab vermək mümkün deyil. O hesab edir ki, bu, mövcud vəziyyət və situasiyadan asılıdır.

İ.Orucov hazırda yoluxma sayında kəskin artım olmadığını deyir, amma vətəndaşlar məsuliyyət nümayiş etdirmədiyi halda məktəblərin yenidən bağlana biləcəyini də istisna etmir.

“Oxu.az” saytı “Əhali banklardakı əmanətlərini geri çəkib” sərlövhəli məqalədə əhalinin banklardakı əmanətlərinin həcminin azalmasını diqqətə çatdırır.

Müəllif deyir ki, 2021-ci ilin yanvar ayı üzrə Azərbaycanda kredit təşkilatlarında yerləşdirilmiş depozit və əmanətlərin həcmi 23 milyard 189,3 milyon manat təşkil edib. Müəllif Mərkəzi Banka istinadən deyir ki, bu, 2020-ci ilin yanvar ayı ilə müqayisədə depozit və əmanətlərin həcminin 6,6 faiz azalması deməkdir.

Müəllif əlavə edir ki, bu vəsaitlərdən 8 milyard 202,9 milyon manatı fiziki şəxslərin əmanətlərini, 1 milyard 833,4 milyon manatı maliyyə təşkilatlarının, 13 milyard 153 milyon manatı isə qeyri-maliyyə təşkilatlarının vəsaitlərini əhatə edib. 

Müəllifə görə, 2020-ci ilin yanvar ayı ilə müqayisədə maliyyə təşkilatlarının depozitlərinin həcmi 5,2 faiz artsa da, qeyri-maliyyə qurumlarında depozitlərin həcmi 9,3 faiz azalıb.

Fiziki şəxslərin banklardakı əmanətlərinin həcminə toxunan müəllif deyir ki, bu həcm əvvəlki ilin müvafiq dövrünə nəzərən 4,5 faiz azalaraq 8 milyard 202,9 milyon manat təşkil edib. Onların əmanətlərinin 49,3 faizi milli valyutada (4 milyard 47,5 milyon manat), 50,7 faizi isə xarici valyutada (4 milyard 155,4 milyon manat) olub.

Müəllifə görə, rezidentlərə məxsus əmanətlərin həcmi fiziki şəxslərə məxsus əmanətlərin 96,5 faizini (7 milyard 917 milyon manat) təşkil edib. Onların banklardakı əmanətlərinin həcmi ötən ilin yanvar ayı ilə müqayisədə üç faiz azalıb.

Qeyri-rezidentlərin, yəni ölkə hüdudlarından kənarda yaşayan və ya ölkədə müvəqqəti qalan fiziki şəxslərin banklardakı əmanətlərinin həcmi isə 286 milyon manat təşkil edib və 2020-ci ilin müvafiq ayı ilə müqayisədə əmanətlərin həcmi 32,4 faiz azalıb.