DQ-də qalib gələn Araik Arutyunyan eyni zamanda həm Paşinyanın, həm də Sarkisyanın adamıdır

Bakı/01.04.20/Turan: Tanınmamış "Dağlıq Qarabağ Respublikasında" "prezident" seçkilərində keçmiş "baş nazir" Araik Arutyunyan liderlik edir, bu barədə yerli MSK məlumat yayıb. İlkin məlumatlara görə, o, 33 min seçici səsi alıb. İkinci yerdə yerli "XİN"in başçısı Masis Mailyan (16,3 min səs), üçüncü yerdə "Təhlükəsizlik Şurası"nın keçmiş sədri Vitaliy Balasanyan (8,6 min səs) gəlir. "Seçkilərdə" təxminən 76,5 min nəfər səs verib, iştirak 72,7% təşkil edib, deyə yerli MSK qeyd edir (İnterfaks.ru).

Dağlıq Qarabağda Paşinyanyönlü qüvvələr sosial şəbəkədə qəzəblərini bölüşür. "Bu... heç nə dəyişmir: hakimiyyət Serjikin növbəti yetişdirməsinin, mübaliğəsiz bütün Qarabağın nifrət etdiyi 3 nömrəli talançı Araik Arutyunyanın "qələbəsini" hazırlayıb. Hətta ondan Bako Saakyandan (DQ-nin faktiki lideri) daha çox nifrət edirlər. 34,5 min nəfər əhalisi olan Stepanakertdə, sən demə, ... 39 min seçici var! Təsəvvür edirsən? Belə bir biabırçılıq görməmişəm", deyə DQ paytaxtının sakini şəbəkədə yazır.

Şəbəkənin DQ-dən olan başqa bir fəalı Arutyunyanın siyasi xasiyyətnaməsini təqdim edir: "Məsələnin incəliyi ondadır ki, Araik Arutyunyan həm Paşinyanın, həm Serjikin kadrıdır. Amma daha çox o, ABŞ-ın kadrıdır, çünki ABŞ Konqresinin kitabxanasında çıxış edərkən Araik Arutyunyan ağzını köpürdə-köpürdə amerikalılara deyirdi ki, "biz sizinlə ortaq dəyərlərin daşıyıcısıyıq".

Yerevandan üçüncü fikir: "ER-də və DQ-dəki vəziyyəti başa düşmək üçün Bibliyanı yada salmaq lazımdır. Serjik Paşinyanı doğub, Paşinyan Araiki doğub və s. Məsələn, İsrail mənbələri iddia edir ki, Paşinyan da Serjikin adamıdır. Buna görə iki ildir heç kim Serjikə toxunmur, "nədənsə" Koçaryanı həbs edirlər, baxmayaraq ki, xalq Koçaryanı deyil, Serjiki devirib. Buna görə də DQ-də də Serjikin, demək olar ki, hamının nifrət etdiyi adamı "qalib gəlir". Artıq bütün Yerevan bu haqda danışır, insanlar Serjikin Paşinyanı ilə birlikdə ermənilərə kələk gəlməsindən, heç bir inqilab olmamasından, ABŞ-ın himayəsi altında hakimiyyətin "gizlicə" təhvil verilməsindən və s. hiddətə gəlib. Bu virus sadəcə olaraq Ermənistan hakimiyyətinə kömək edib, çünki orada Paşinyana qarşı əsl inqilab dalğası başlayırdı".

"Dağlıq Qarabağda 103 min seçici yoxdur" sərlövhəli məqalə seçkilərin saxtalaşdırılmasından bəhs edir. Məqalə müəllifi, müstəqil "Üçüncü Qüvvə Üstəgəl" qəzetinin baş redaktoru Vaqram Aqacanyan yazır: "DQ MSK açıq-aşkar Ermənistan ictimaiyyətinə və diasporalara yalan məlumat verir. DQ MSK-nın məlumatına görə, Dağlıq Qarabağda seçici sayı 103 663 nəfərdir. Bu rəqəm açıq-aşkar həqiqətə uyğun deyil və Ermənistan ictimaiyyətinin və xaricdəki erməni diasporasının yanlış məlumatlandırılmasına yönəlib. 103 663 seçici olması üçün Dağlıq Qarabağ əhalisinin 140-150 min nəfərə çatması lazımdır. Bu, təkcə peşəkarlara deyil, sakinlərə də aydındır. DQ hakimiyyətinin carçıları da gözlərini belə qırpmadan məhz bu rəqəmi səsləndirir, DQ-də təxminən 150 min nəfər yaşadığını bəyan edir.

Yəni, Serj Sarkisyanın adamının - Bako Saakyanın və onun MSK-sının "məntiqinə" əsasən, 32 il ərzində Dağlıq Qarabağda insanlar ümumiyyətlə nə doğulmayıb, nə də ölməyib - 1988-ci ildə olduğu kimi, 150 min nəfər olaraq qalıb! Bax belə, yumşaq desək, qəribə demoqrafik "sabitlik" var.

"Üçüncü Qüvvə Üstəgəl" qəzeti bütün məsuliyyəti ilə bəyan edir: bu rəqəm tamamilə mövcud reallıqlarla heç bir əlaqəsi olmayan yalandır. Dəqiqləşdirilməkdə olan məlumatlara görə, hazırda Qarabağ əhalisi təxminən 100 min nəfər təşkil edir (bəlkə bir qədər çox: dəqiq rəqəmi heç kim bilmir, belə ki, hakimiyyət bu rəqəmləri qəsdən gizlədir). Bu isə o deməkdir ki, Qarabağda seçicilərin sayı 60-65 min nəfər təşkil edir. Bu isə, öz növbəsində, o deməkdir ki, DQ hakimiyyəti seçicilərin təxminən üçdə birinin - təxminən 40 min nəfərin səsini hakimiyyətyönlü namizədlərə yazaraq, seçkilərin nəticələrini saxtalaşdırmağa hazırlaşır.

Başqa bir fakt da anlaşılmazlıq doğurur. Hakimiyyət bildirir ki, 282 seçki məntəqəsi formalaşdırılıb, onlardan biri DQ-nin Ermənistandakı nümayəndəliyində, digəri "Şuşa"nın cinayət-icra müəssisəsindədir. DQ hakimiyyətinə sual: bəs niyə DQ-nin Avropa ölkələrində, Livanda, ABŞ-da və xüsusən on minlərlə qarabağlının yaşadığı Rusiya Federasiyasında məntəqələr yaradılmayıb? Serj Sarkisyan rejimi və DQ hakimiyyəti onları təkcə Vətənlərindən qovmayıb, həm də seçki hüquqlarından məhrum edib?

Yuxarıda deyilənlərdən irəli gələrək, Ermənistan Respulikasının prezidentinə və baş nazirinə üz tuturam: hörmətli cənablar Sarkisyan və Paşinyan, Ermənistan hakimiyyətinin Dağlıq Qarabağda azad, şəffaf və demokratik seçkilərin zamini kimi çıxış edəcəyinə söz vermişdiniz. Bu seçkilər artıq mövcud qanunvericiliyin ən kobud şəkildə pozulması ilə - seçicilərin sayının saxtalaşdırılması ilə başlayıb. Sizi Dağlıq Qarabağda qanunun və ədalətin bərpası üzrə təxirəsalınmaz tədbirlər görməyə çağırıram. Ermənistanın eks-prezidenti Serj Sarkisyanın və Bako Saakyanın səyləri ilə qanunsuz olaraq bağlanmış müstəqil "Üçüncü Qüvvə Üstəgəl" qəzetinin baş redaktoru Vaqram Aqacanyan", deyə bağlanmış qəzetin baş redaktoru yazır.

Əlavə edək ki, bu qəzetin maliyyə vəsaiti bank hesablarından Rusiya kəşfiyyatının keçmiş zabiti Vadim Pozdnyakov tərəfindən oğurlanıb. Aqacanyan bir neçə ildir qəzetin pulunun qaytarılması uğrunda mübarizə aparır, Ermənistan və Dağlıq Qarabağ hakimiyyətini ona kömək etmək istəməməkdə ittiham edir.

Avropa İttifaqı, Azərbaycan, Türkiyə, Pakistan, İran və Ukrayna, habelə ATƏT-in Rusiya, Fransa və ABŞ-ın həmsədri olduğu Minsk Qrupu DQ-dəki "seçkiləri" tanımayıb.

Turan-ın hələ 2008-ci ildə Avropanın Dağlıq Qarabağda işləyən diplomatik mənbələrindən aldığı məlumata görə, həmin vaxt burada maksimum 70 min nəfər yaşayırdı. -0-