DTX döyüş bölgəsindən videogörüntü yayanlara qarşı cinayət işinə başlayıb

Bakı/04.11.20/Turan: Dövlət Təhlükəsizliyi Xidməti (DTX) döyüş bölgəsindən videogörüntülər yayan şəxslərə qarşı cinayət işi qaldırıb.

DTX-nin məlumatında deylir ki, dövlət orqanlarının həyata keçirdiyi dövlət sirrinin mühafizəsi tədbirlərinə zidd olaraq və müvafiq xəbərdarlıqlara baxmayaraq, Azərbaycan qoşunlarının strateji və əməliyyat planları, dislokasiyası və yerdəyişmələri, şəxsi heyəti, silah və hərbi texnikaları, digər döyüş təminatı, əməliyyat şəraiti barədə məlumatları əldə etməyə imkan verən müxtəlif videomateriallar yayılıb.

“Qeyd olunan videogörüntülər düşmən ordusu tərəfindən Azərbaycan qoşun hissələrinin qüvvə və mövqeləri barədə informasiyanın əldə edilməsi, həmçinin kəşfiyyat-təxribat fəaliyyətinin həyata keçirilməsi məqsədləri üçün istifadə olunub.

Aşkar edilmiş faktlar üzrə DTX-da CM-in 284-cü (dövlət sirrini yayma) maddəsi ilə cinayət işi başlanılıb, hazırda həmin şəxslərin cinayət əməlləri ilə bağlı istintaq aparılır”, - məlumatda deyilir.

DTX bir daha vətəndaşlara fəal döyüş zonasından icazəsiz videoçəkilişlərin aparılmasının və yayılmasının cinayət məsuliyyətinə səbəb olduğu barədə xəbərdarlıq edir, əsgərin həyatına təhlükə yaradan bütün davranışlardan çəkinməyə çağırır.

DTX qaldırılmış cinayət işi üzrə saxlanılanlar barədə məlumat vermir. -03-