Dünya Azərbaycanlılarının V Qurultayı: birliyə doğru, yoxsa piar?

Bakı/21.04.22/Turan:  Aprelin 22-də və 23-də Şuşada Dünya Azərbaycanlılarının V Qurultayının keçiriləcəyi bildirilir. Diasporla İş üzrə Dövlət Komitəsinin sədri Fuad Muradov bildirib ki, tədbirdə 65 ölkədən 400 nəfərə yaxın diaspor nümayəndəsinin iştirakı gözlənilir. İlk belə qurultay 2001-ci ildə Bakıda keçirilib.

Qurultayın rəsmi açılış mərasimindən sonra Diasporla İş üzrə Dövlət Komitəsinin fəaliyyətinə dair hesabat verilməsi, "Postmüharibə dövründə Azərbaycan diasporunun qarşısında duran vəzifələr", "Qarabağın bərpası və yenidən qurulmasına Azərbaycan diasporunun töhfələri" mövzularında müzakirələrin təşkili planlaşdırılır.

Tədbiri "Zəfər Qurultayı" adlandıran Muradov qeyd edib ki, tədbirin tarixi zəfərin rəmzi olan Şuşada keçirilməsi çox böyük siyasi əhəmiyyətə malik olan əlamətdar tarixi hadisə, unudulmayacaq böyük bayramdır.

Lakin proqramda qurultay zamanı dünyada yaşayan azərbaycanlıların problemlərinin müzakirə olunub-olunmayacağı barədə heç bir məlumat yoxdur.

Halbuki, bu kimi problemlər mütəmadi olaraq yaşanır. İranda azərbaycanlı fəallar həbs olunur, üstəlik, istər koronavirus, istərsə də Rusiya-Ukrayna savaşı vaxtı Azərbaycan vətəndaşları günlərlə, həftələrlə Rusiya-Azərbaycan sərhədində gözlədildi, ölkələrinə buraxılmadı.

Bəs sabah keçiriləcək qurultayda bu problemlər müzakirə olunacaqmı? Belə qurultaylar Azərbaycan hakimiyyətinə təbliğat üçün lazımdır, yoxsa həqiqətən də dünyadakı azərbaycanlıların problemləri yoluna qoyulur?

Milli Məclisin deputatı, Yeni Azərbaycan Partiyasının İdarə Heyətinin üzvü Cavid Osmanov Turan-a bildirib ki, Ulu öndər Heydər Əliyev müstəqil Azərbaycana rəhbərlik etdiyi dövrdə xarici ölkələrə səfərləri zamanı həmin ölkələrdə yaşayan azərbaycanlılarla mütləq görüşürdü. "Bu, adətən onun səfər proqramının tərkib hissəsini təşkil edirdi. Vətəndən uzaqda yaşayan azərbaycanlılarla görüşərkən Ulu Öndər onların problemləri ilə maraqlanır, Azərbaycan həqiqətlərinin dünyaya çatdırılması işində onlara tapşırıq və tövsiyələrini verirdi".

O qeyd edib ki, Əliyevin 2001-ci il mayın 23-də "Dünya Azərbaycanlılarının I Qurultayının keçirilməsi haqqında" Sərəncamı imzalaması dünya azərbaycanlılarının təşkilatlanması işinə çox mühüm töhfə olub. "I Qurultayda 103 nəfərdən ibarət Dünya Azərbaycanlılarının Əlaqələndirmə Şurası yaradıldı, 23 nəfərdən ibarət İdarə Heyəti seçildi, həmçinin 5 mühüm sənəd qəbul edildi. Bütün bunlar sübut edir ki, dünya azərbaycanlılarının təşkilatlanması və diaspor quruculuğu məhz ümummilli lider Heydər Əliyevin adı ilə bağlıdır".

Deputatın sözlərinə görə, Heydər Əliyevin hər bir sahədə siyasi kursunu uğurla davam etdirən prezident İlham Əliyevin bu istiqamətdə xidmətləri danılmazdır. "Dövlətimizin başçısının müvafiq sərəncamlarına əsasən, dünya azərbaycanlılarının 2006-cı il martın 16-da II, 2011-ci il iyulun 5-6-da III, 2016-cı il iyunun 3-4-də isə lV qurultayları keçirilib. Azərbaycan prezidenti İlham Əliyev qurultayların hər birində geniş nitqlə çıxış edərək, dünya azərbaycanlılarının davamlı olaraq təşkilatlanması və diaspor fəaliyyətinin müasir dövrün tələbləri əsasında qurulması ilə əlaqədar mühüm tapşırıq və tövsiyələrini verib".

Osmanov vurğulayıb ki, Dünya azərbaycanlılarının qurultaylarında Azərbaycan həqiqətlərini özündə əks etdirən bir çox mühüm qərar və müraciətlər qəbul olunub. "2018-ci ildə yeni Strateji Yol Xəritəsinin işlənib hazırlanması və icrası nəticəsində bu sahədə bir çox uğurlara imza atılıb. Yol xəritəsinə uyğun olaraq diaspor fəaliyyətində informasiya-kommunikasiya texnologiyalarının tətbiqi və inkişafı əsas vəzifələrdən biri kimi qarşıya qoyulub. Son 4 ildə 31 ölkəni əhatə edən 14 Koordinasiya Şurası və 12 ölkədə 18 Azərbaycan Evi yaradılıb ki, bu da həyata keçirilən məqsədyönlü fəaliyyətin nəticəsidir".

Deputat qeyd edib ki, dünyada yaşayan azərbaycanlıların təşkilatlanması və diaspor fəaliyyətinin genişləndirilməsi işinə Birinci vitse-prezident Mehriban xanım Əliyeva və onun rəhbərlik etdiyi Heydər Əliyev Fondu da çox mühüm töhfələr verir. "Birinci vitse-prezident Mehriban xanım Əliyevanın təşəbbüsü ilə xaricdəki azyaşlı uşaqlar üçün "Qarabağ" Azərbaycan məktəbləri təsis olunub və hazırda 250-dən artıq azərbaycanlı uşaq həmin məktəblərdə ana dilində təhsil alır".

Onun sözlərinə görə, dünya azərbaycanlıların təşkilatlanması və diaspor fəaliyyətinin dövlət tərəfindən davamlı olaraq nəzarətdə saxlanılması, bu istiqamətdə lazımi işlərin həyata keçirilməsi Vətən müharibəsi dövründə uğurlu nəticəsini verib. "Dünya Azərbaycanlılarının V Qurultayı, həmçinin xaricdə yaşayan soydaşlarımızın, mövcud təşkilatların fəaliyyətinin koordinasiyası, milli həmrəylik və birlik ideyasının reallaşdırılması işinə də öz gələcək töhfəsini verəcək".

ABŞ-da yaşayan siyasi şərhçisi Ərəstun Oruclu isə hesab edir ki, bütün bu tədbirlər daha çox hakimiyyətin özünü təbliğ etməsinə xidmət edir.

O bildirib ki, əgər Azərbaycan hakimiyyəti doğrudan da dünya azərbaycanlıları ilə bağlı hansısa tədbirlər keçirirsə, ilk növbədə hakimiyyətin özünün azərbaycanlılara yönəlik siyasətinə düzəliş etməlidir. "Əgər Azərbaycanda insanların hüquqları, adicə işlə təmin olunmaq, təhsil almaq, sağlamlıq, yaşamaq hüquqları təmin olunmursa, belə tədbirlərin məqsədləri nədir? Yəni, dünya azərbaycanlılarını buna cəlb etmək, dünya azərbaycanlıları ilə bağlı mesajlar vermək üçün birinci növbədə ölkə daxilində insan hüquq və azadlıqlarını təmin etmək lazımdır".

Politoloq qeyd edib ki, bunu etməyən bir hakimiyyətin dünya azərbaycanlılarının hüquqları, mədəniyyəti, onların dilini qorumaq haqqında danışması doğru deyil. -0-