Ekologiya və təbii sərvətlər naziri Söyüdlü sakinlərinə bildirib ki, “narahatlığa əsas yoxdur”

Bakı/22.06.23/Turan: Gədəbəydə qızıl mədəninin fəaliyyətinin ətraf mühitə təsirini qiymətləndirmək üçün yaradılmış hökumət komissiyasının üzvləri bu gün Söyüdlü kəndində olub və yerli sakinlərlə görüşüblər.

Komissiyanın rəhbəri, ekologiya və təbii sərvətlər naziri Muxtar Babayev bildirib ki, komissiya üzvləri kimyəvi təmizlənmədən sonra mədəndən turşu qalıqlarının atıldığı gölməçəyə və ətraf əraziyə baxış keçiriblər.

Komissiya monitorinq üçün xüsusi cihazlarla ölçmələr aparıb.

"Bu avadanlıqlar torpaqdan, havadan və sudan nümunələrin analizi aparılır. Biz xüsusi cihazlarla kəndin ətrafındakı atmosfer havasını ölçdük. Təhlükəli maddələr aşkar edilməyib. Havadakı texniki qazların parametrləri normaldır. Atmosferdə sianid izləri aşkar edilməyib. Narahatlığınız üçün heç bir əsas yoxdur", - Babayev deyib.

Onun sözlərinə görə, torpaq və su nümunələri də xüsusi laboratoriyada təhlil ediləcək və nəticələr əhaliyə təqdim olunacaq.

O qeyd edib ki, ümumilikdə gölün ətraf mühitə və yerli sakinlərin sağlamlığına nə qədər mənfi təsir göstərdiyi öyrəniləcək.

Nazir sənaye istehsalının fəaliyyətinin araşdırılacağını da vurğulayıb. "Hər hansı bir zərər varsa, onu minimuma endirmək üçün tədbirlər görüləcək", - Babayev deyib.

Nazir hesab edir ki, müəssisə zavodun ətrafında yerləşən kəndlərin əhalisilə maarifləndirmə işləri aparmalıdır.

Öz növbəsində kənd sakinləri bildiriblər ki, komissiya onları monitorinqə cəlb etməyib.

"Nazir klubda məhdud sayda sakinlə görüş keçirib. Görüşə bizim tələblərimizi birbaşa ifadə edə biləcək adamları buraxmayıblar. Əgər ikinci göl tikilərsə, sakinlər otlaqlarından və yaşayış mənbələrindən məhrum olacaqlar", - kənd sakinlərindən biri deyib.

O qeyd edib ki, polis kəndlərə bütün girişləri nəzarətə götürüb və kənar şəxslərin girişinə icazə vermir. 03B06