Ekspertlər Qəbələ RLS-in bağlanması barədə

Həm hərbi, həm də ətraf mühitə təsir baxımından Qəbələ RLS-in Azərbaycan üçün faydası yox idi. Odur ki, bu obyektin fəaliyyətinin dayandırılmasını müsbət siyasi qərar  hesab etmək lazımdır. Bunu Turan-a hərbi ekspert Üzeyir Cəfərov deyib.  

Bununla yanaşı o, Rusiyanın RLS-dən öz xoşu ilə imtina etməsinə şübhə edir. Belə ki, RLS Moskvanın Azərbaycanda öz hərbi iştirakını saxlamağa imkan verirdi. “Sözsüz ki, Rusiya obyekti xoşagəlməz təəssüratla tərk edir”, - o qeyd edib. RLS-in gələcək taleyinə gəlincə, Azərbaycan üçün bu, hərbi dəyərə malik deyil və onun istismarı üçün ölkənin resursları yoxdur. Əsas hərbi təhlükə mənbəyi Ermənistandır ki, Azərbaycan HHM düşmənin mümkün hava zərbələrinin qarşısını ala bilər. 

Ü.Cəfərov hesab edir ki, Azərbaycan Moskvanı qıcıqlandıracaq addımlardan çəkinərək Qəbələ RLS-i 

üçüncü ölkəyə verməyəcək. Onu fikrincə, tezliklə obyekt söküləcək.

Politoloq Eldar Namazov obyektin Azərbaycan üçün hərbi əhəmiyyət daşımaması barədə fikirlərlə razıdır. İcarə haqqının aşağı olması isə onu ölkə üçün iqtisadi baxımdan əlverişsiz edib. 

Bu,  Azərbaycanın öz hərbi obyektini Ermənistanın hərbi müttəfiqinə verməsi ilə bağlı unikal vəziyyət yaradırdı.  

E.Namazov güman edir ki, Moskva Azərbaycanda hərbi iştirakını itirir və bu diplomatik, siyasi əlaqələr üçün mənfi nəticələrə səbəb ola bilər. Lakin bunun nə dərəcədə mənfi olacağını zaman göstərəcək.

“Şərq-Qərb” Mərkəzinin rəhbəri Ərəstun Oruclu güman edir ki, Qəbələ RLS-in bağlanması regional və qlobal sazişin bir hissəsidir. O, diqqəti ona yönəldib ki, qərar Vladimir Putinin Türkiyəyə səfərindən sonra qəbul edilib. Səfər zamanı o bildirib ki, Moskva Türkiyənin sərhədlərində “Petriot” sisteminin yerləşdirilməsinin əleyhinə deyil və faktiki olaraq Əsəd rejiminin dəstəklənməsindən imtina edib. 

Ə.Oruclunun fikrincə, Rusiya əvəzində Qərbdən hansısa zəmanəti alıb və bu, Suriyada münaqişədənsonrakı duruma aiddir. Belə ki, orada Rusiyanın hərbi bazası saxlanacaq.  “Azərbaycan Rusiyanın Qəbələdən getməsi barədə qərar qəbul etməyib”, - Ə.Oruclu RLS-in bağlanmasının ikitərəfli münasibətlərə mümkün təsiri ilə bağlı sualın cavabında deyib.

Ola bilsin ki, Rusiya zəmanət alıb ki, bu obyekt kiməsə verilməyəcək.  Lakin o, obyektin saxlanacağını istisna etmir. 

Prezident Administrasiyası rəhbərinin müavini, xarici əlaqələr şöbəsinin müdiri Novruz Məmmədov yerli mediaya bildirib ki,  2012-ci ilin əvvəlindən iki ölkə arasında stansiya ilə əlaqədar danışıqlar aparılıb. O həmçinin RLS-dən Rusiyanın imtina etməsinin ikitərəfli münasibətlərə təsir etməyəcəyini düşünür: “Rusiyanın icarə haqqı kimi ödədiyi məbləğ simvolik xarakter daşıyırdı. Bununla bağlı mövqeyimizi dəfələrlə Rusiyaya bildirmişik. Biz Rusiya ilə iqtisadi əməkdaşlığın hamısını ən yüksək tələblər çərçivəsində qururuq. İstədik ki, Rusiya da Qəbələ informasiya stansiyası məsələsində əməkdaşlığı yeni şəraitə uyğun qursun və bizim əməkdaşlığımız davam etsin. Onlar bununla razılaşmadılar və bu, onların öz işidir. Hesab edirəm ki, biz əlimizdən gələni etdik, ona görə bu məsələnin bizim ikitərəfli münasibətlərə hər hansı formada təsir göstərə biləcəyi barədə heç düşünmürəm”. 

N.Məmmədov RLS-in gələcək taleyi ilə bağlı Qəbələ rayonunun turizm rayonu olduğuna işarə edib. Üstüörtülü olsa da anladıb ki, stansiya ləğv edilə bilər. “Ona görə də Qəbələnin gələcək taleyi ilə bağlı heç bir problem yoxdur və olmayacaq da. Hesab edirəm ki, Qəbələnin gələcək təyinatı artıq müəyyənləşib. Stansiyanın taleyi ilə bağlı qərar bir qədər sonra qəbul ediləcək”.

Administrasiya rəhbərinin müavini deyib ki, RLS heç kimə istifadəyə verilməyəcək. Eyni zamanda o, stansiya ilə bağlı danışıqların aparılacağı ehtimalını da anladıb: “Sökülmək deyəndə, biz yəqin ki, onu heç kimə istifadəyə verməyəcəyik. Hələlik mənim bununla bağlı heç bir məlumatım yoxdur. Bununla bağlı indiyədək heç bir danışıq da getməyib və belə bir danışıq gedə də bilməzdi. Çünki bu məsələdə Rusiya ilə işləyirdik, danışıqlar aparırdıq. Necə ola bilərdi ki, eyni vaxtda başqa kiminləsə danışıq aparaq? Azərbaycanın xarici siyasət kursunda belə addımlar atılmır”.-03B06-