Əli Həsənovun versiyasına görə, Gülər Əhmədova korrupsiyaya qarşı mübarizə aparır

Hakimiyyətin baş ideoloqu Əli Həsənov hakim partiyadan deputat Gülər Əhmədovanın Beynəlxalq Universitetin rektoru ilə deputatlıq kürsüsü uğrunda qiymət hərracı apardığını əks etdirən videoçarxla bağlı şərhlə çıxış edib.

Hakimiyyətin korrupsiyaya qarşı uğurlu mübarizə apardığını qeyd edən Həsənov eyni zamanda bu videoçarxın “dövlətin korrupsiyaya qarşı mübarizə çərçivəsində müvafiq addımlar atması üçün əsas verdiyini” etiraf edib.

Daha sonra Həsənov Elşad Abdullayevi qeyri-qanuni yollarla hakimiyyət orqanlarına yol tapmaq cəhdində ittiham edir. “Onun bu istəyinin baş tutmaması dövlət orqanlarının belə hallara qarşı əsl münasibətinin göstəricisidir”, deyə Həsənov bildirib.

Hakimiyyətin mövqeyi belədir ki, vəzifəni qanunsuz əldə etmək və ya seçkili orqanlara düşmək cəhdləri baş tutmayıb, tutmur və tutmayacaq, deyən Həsənov söz verib ki, müvafiq orqanlar bu video çarxla bağlı zəruri tədbirləri görəcəklər.

Bu coşqun və emosional bəyanatdan belə çıxır ki, hakimiyyət etiraf edir: çarx saxta deyil, oradakı məhz Gülər Əhmədovadır, parlamentə seçilməyin qiyməti haqqında alver edilir. 

Bununla əlaqədar olaraq Əhmədovanın məsuliyyəti haqqında sual yaranır. Əli Həsənova inansaq, deputat kürsüsünün qiyməti haqqında razılaşma aparan hakim partiyanın üzvü və deputat Gülər Əhmədovanın cəzası necə olacaq?

Onu da qeyd edək ki, Həsənovun şərhləri nahardan sonra meydana çıxıb, səhər saatlarında isə o, Turan-a bu videoçarxla bağlı şərh verməkdən imtina edirdi.

Baş Prokurorluqdan da eyni cavabı veriblər, lakin nahardan sonra məlum olub ki, təhqiqat başlanıb. -02D-