Sabah Bakıda ənənəvi səhiyyə sərgisi açılır

 Sabah Bakıda “Ekspo” Mərkəzində ənənəvi “Səhiyyə” BIHE 2012 sərgisi açılır. Tədbir 29 sentyabra kimi davam edəcək. Bu gün İteca Caspian LLC şirkəti Səhiyyə Nazirliyi və Azərbaycan Stomatoloqlar Assosiasiyası təmsilçilərinin iştirakı ilə mətbuat konfransı keçirib. 

«Regionda tibb və səhiyyə üzrə yeganə sərgi olan BIHE dövlət təmsilçiləri, tibb təyinatlı avadanlıq və məmulat istehsalçıları, təcrübə keçən həkimlər, tibb sənayesi mütəxəssislərinin vacib görüş yeridir», deyə İteca Caspian-ın biznesin inkişafı üzrə direktoru Bəhruz Hidayətzadə bildirib. Onun sözlərinə görə, bu il səhiyyə sərgisində 16 ölkədən 107 şirkət iştirak edəcək. Sərgidə tibbi və laboratoriya avadanlığı, əczaçılıq preparatları, infeksiya əleyhinə vasitələri, ortopedik məhsulları və s. nümayiş etdiriləcək. Yeni preparat və texnologiyaları Siemens, Draeger, Toshiba kimi şirkətlər təqdim edəcək. İştirakçılar öz stendlərində səhiyyə sahəsində son nailiyyətləri nümayiş etdirəcəklər: yüksək texnologiyalı diaqnostika və müalicə metodları, effektiv texnologiya və xidmətlər, tibb texnikası. 

BİHE-2012 meneceri Esmira Ağayeva bildirib ki, sərgiyə maraq artır və bu il iştirakçı sayı 10% artıb. İlk dəfə sərgidə Türkiyənin xarici iqtisadi əlaqələr komitəsi ayrıca stendlə iştirak edir. Belçika Xəstəxanalar Assosiasiyası da sərgiyə ilk dəfə qoşulur. 

Səhiyyə Nazirliyi mətbuat xidmətinin rəhbəri Anar Qədirli qeyd edib ki, Azərbaycanda dövlət sektoru ilə paralel özəl tibb sektoru da inkişaf edir. O, bu gün 600 xəstəxana, klinika və laboratoriyanı birləşdirir. Onun sözlərinə görə, son 5 ildə özəl sektorda tibbi xidmət səviyyəsi çox yüksəlib. 

 BIHE ilə paralel sentyabrın 27-dən 29-dək 7-ci Azərbaycan Beynəlxalq stomatologiya, Beauty Azerbaijan 2012 6-cı Azərbaycan Beynəlxalq gözəllik və estetik tibb sərgiləri açılacaq