Əli İnsanov: Səhiyyə Nazirliyinin obyektlərini Əliyevlər ailəsi özəlləşdirib

Bu gün Bakı Appeləsiyə Məhkəməsində Qədim Babayevin sədrliyi ilə keçmiş səhiyyə naziri Əli İnsanovun işi üzrə proses davam etdirilib.

Təkrar istintaq Avropa İnsan Hüquqları Məhkəməsinin 14 mart 2013-cü il tarixli İnsanovun hüquqlarının pozulması haqqında qəbul etdiyi qərarla əlaqədar aparılır. AİHM-nin qərarının icrası üçün Azərbaycan Ali Məhkəməsinin Plenumu 15 noyabr 2013-cü ildə işi təkrar baxılması üçün apellyasiya məhkəməsinə göndərilib.

Proseslə əlaqədar xüsusi təhlükəsizlik tədbirləri görülüb. Jurnalistləri və digər müşahidəçiləri ayaqqabılarını belə çıxararaq yoxlayıblar.

Zala daxil olan İnsanov prosesdə iştirak edən Demokratik Qüvvələrin Milli Şurasının (DQMŞ) rəhbəri Cəmil Həsənliyə yaxınlaşıb və dəstəyə görə ona təşəkkür edib.

Daha sonra toplaşanlara müraciət edərək deyib: “Narahat olmayın, demokratiya meşə yanğını kimi Azərbaycan sərhədlərinə yaxınlaşır”.

Bundan sonra İnsanovu səs keçirməyən şüşə qəfəsə - “akvariuma” yerləşdiriblər.

İclas ərzində hakim İnsanov İlham Əliyevin və digər yüksək vəzifəli məmurların adlarını çəkən kimi dəfələrlə onun mikrofonunu söndürüb.

Vəkil Şahverdi Ağayev cinayət işinə xitam verilməsi haqqında vəsatət qaldırıb.

Lakin hakim vəsatəti təmin etməyib.

Daha sonra ittiham tərəfin 11 şahidindən 7-si çıxış edib. Bu, Maliyyə Nazirliyinin və digər idarələrin əməkdaşları, Səhiyyə Nazirliyinin obyektlərinin özəlləşdirilməsi ilə bağlı rəy verən ekspertlər idi.

Şahidlər bildiriblər ki, özəlləşdirilən obyektlərin dəyərini Səhiyyə Nazirliyi deyil, İqtisadi İnkişaf Nazirliyinin Özəlləşdirmə Departamenti müəyyən edirdi. Alış-satış haqqında qərarları da Səhiyyə Nazirliyi qəbul etmirdi.

İnsanov iclas zamanı DQMŞ-nin fəxri sədri Rüstəm İbrahimbəyovu 75 illik yubileyi münasibətilə təbrik edərək, onu “böyük Azərbaycanlı” adlandırıb.

Daha sonra o qeyd edib ki, o nazir olduğu zaman 59 obyekt özəlləşdirilib, onların 32-si kiçik obyektlərdir. 28 obyekt böyük, o cümlədən 2-2,5 hektar torpaq sahəsi olan obyektlər idi və onları Əliyevlər ailəsinin üzvləri özəlləşdiriblər.

“50 min obyektin özəlləşdirilməsindən büdcəyə 500 mln. dollar köçürülüb, 30 mlrd. dolları isə hakim ailə mənimsəyib”, deyə İnsanov qeyd edib, hakim dərhal mikrofonu söndürüb.

“Onlar hətta əli-ayağı bağlı halda belə məndən qorxurlar. Onlar məni öldürmək istəyirlər”, - deyə İnsanov bildirib. Daha sonra o, hakimdən soruşub: “Məni təyin etdiyim şəxs rüşvət aldığına görə həbs ediblər. Onda məni təyin edən İlham Əliyevi də həbs edin”.

İnsanov bildirib ki, Semaşko adına xəstəxananın 2 hektarını İlham Əliyevin əmisi oğlu mənimsəyib.

“Özəlləşdirmədə pozuntulara etiraz etdim və məni həbs etdilər”, deyə İnsanov bildirib.

İnsulinin sui-istifadəsi ilə bağlı ittihamlara toxunan keçmiş nazir qeyd edib ki, Aptek İdarəsinin rəisi Rafiq Mahmudov (İlham Əliyevin baldızının keçmiş həyat yoldaşı) idi. Bakının Aptek İdarəsinin rəisi isə Mehriban Əliyevanın əmisi idi, deyə İnsanov bildirib.

Daha sonra vəkillər az ağır cinayətlər üzrə müddətin bitməsi ilə əlaqədar ittihamların ləğv edilməsi haqqında vəsatət qaldırıblar. Onlar həmçinin birinci prosesin videomateriallarına baxılması haqqında vəsatət qaldırıblar, belə ki, məhkəmə qərarlarında İnsanovun xeyrinə bir çox ifadələr məhkəmə qərarlarında təhrif edilib. Lakin məhkəmə vəsatətlərə baxmayıb.

Vəkillər həmçinin yeni vəsatətlər verilməsi üçün vaxt istəyiblər, bununla əlaqədar proses fevralın 14-nə keçirilib. -03C06-