Əli Kərimlinin oğlu 25 gün müddətinə həbs olunub (YENİLƏNİB)

AXCP lideri Əli Kərimlinin oğlu Türkel Kərimli polisə tabe olmamaq ittihamı ilə 25 gün inzibati həbs cəzasına məhkum edilib. Onunla birlikdə saxlanılan digər iki gənc – Ülvi Nuriyev və Coşqun Salayev müvafiq olaraq 25 və 30 gün həbs cəzası alıb. Bu barədə Turan-a T.Kərimlinin vəkili Fəxrəddin Mehdiyev bildirib. 

Vəkil məhkəmənin qərarını qanunsuz hesab edir. Onun sözlərinə görə, gənclər dünən təşviqat plakatlarına baxırdılar və həmin vaxt polis tərəfindən saxlanılıblar.

O, DİN nümayəndəsinin gənclərin sərxoş vəziyyətdə olduğu haqqında sözlərini təkzib edib.

Vəkilin sözlərinə görə, polisdə əvvəlcə təşviqat materiallarının cırılması və 35-60 manat cərimə haqqında protokol imzalanıb. Amma daha sonra ittiham “polisə tabe olmamaq”la əvəz olunub.

Vəkil bildirib ki, prosesdə gənclərə qarşı polis əməkdaşları özləri şahid qismində ifadə veriblər. O, hesab edir ki, məhkəmənin qərarı siyasi motivlidir və ondan şikayət veriləcək. -16D-

2013 Sentyabr 23 (Bazar ertəsi) 16:03:09

Daxili İşlər Nazirliyi AXCP sədri Əli Kərimlinin oğlu Türkel Kərimlinin saxlanılması barədə məsələyə aydınlıq gətirib.

DİN-in mətbuat xidmətinin şöbə rəisi Orxan Mansurzadə Turan-a bildirib ki, Türkel Kərimli daha 2 nəfərlə birgə şəhərdə prezidentliyə namizədlərin seçki plakatlarını cırarkən polis əməkdaşları tərəfindən saxlanılıb.

“Sentyabrın 22-də axşam saatlarında paytaxtın Nəsimi rayonunda 3 nəfər şəxs prezidentliyə namizədlərin seçki ilə bağlı plakatları cırarkən polis əməkdaşları bunu görüb və onları nizam-intizama riayət etməyə dəvət ediblər. Lakin sərxoş vəziyyətdə olan bu şəxslər polislərin qanuni tələblərinə qəsdən tabe olmayaraq müqavimət göstərməyə və hay-küy salmağa başlayıblar. Bununla əlaqədar onlar polislər tərəfindən saxlanılıblar. Həmin şəxslər barəsində məsələ İnzibati Xətalar Məcəlləsinin müvafiq maddəsi ilə sənədləşdirilərək barələrində protokol tərtib olunub və baxılması üçün aidiyyatı üzrə məhkəməyə göndərilib”.

Şöbə rəsinin sözlərinə görə, bəzi KİV-də yayılan məlumatların əksinə olaraq, həmin şəxslər saxlanılarkən onların kimliyi və hansı siyasi partiyaya mənsub olduqları barədə məlumatları olmayıb.-16D-

2013 Sentyabr 23 (Bazar ertəsi) 14:19:28

Ötən gün polis AXCP sədri Əli Kərimlinin oğlu Türkel Kərimlini saxlayıb. 

Ə.Kərimli Turan-a bildirib ki, oğlu iki dostu ilə birlikdə küçədə prezidentliyə namizədlərin təşviqat plakatlarını cırmaqda ittiham olunur. “O, dostları ilə şəhərdə gəzərkən onu tutublar”, - Ə.Kərimli qeyd edib. 

Saxlanılanlar Nəsimi rayon 22-ci polis bölməsinə aparılıblar. Onların məhkəmə qarşısında dayanacağı gözlənilir. 

“Türkelin plakatları cırması yalandır. Onun saxlanması 22 sentyabr mitinqi ilə əlaqədardır. Hakimiyyət bu yolla məndən və ailə üzvlərimdən qisas almaq istəyir”, - Ə.Kərimli vurğulayıb. 

DİN mətbuat xidmətinin şöbə müdiri Orxan Mansurzadə  araşdırmanın aparıldığını bildirib. -16D-