Elmar Məmmədyarov Avropaya qeyri-adekvat formada cavab verəcək

Avropa Parlamentinin Azərbaycana dair qətmanəsinin tənqidinə XİN rəhbəri Elmar Məmmədyarov da qoşulub.

“Avropa Parlamentinin qəbul etdiyi qətnamə Azərbaycanla Avropa İttifaqının münasibətlərinə ciddi zərbə vurub. Bu qətnamədə Azərbaycana qarşı qərəzli  və böhtan xarakterli iradlar irəli sürülür”, - E.Məmmədyarov sentyabrın 16-da mətbuat konfransında bildirib.

Nazir qeyd edib ki, qətnamədə beynəlxalq əlaqələrin mahiyyətinə zidd olaraq etik normalardan kənara çıxan cəfəng və təhqiramiz ifadələrdən istifadə edilir.

“Bu, qəbuledilməzdir. Belə bir qətnamənin qəbul edilməsi heç bir diplomatik məntiqə sığmır”, - nazir vurğulayıb. 

“Azərbaycan müstəqil və suveren ölkədir. Heç bir suveren dövlət diktə və siyasi təzyiq tərzli davranışı qəbul edə bilməz. Tövsiyə edərdik ki, dəyərlərdən danışan Avropa Parlamenti bütün Avropanı bürüyən daha ciddi problemlər, o cümlədən irqi ayrı-seçkilik, ksenofobiya, şovinizm, islamofobiya, radikalizm, ekstremizm və miqrantlara münasibətdə qeyri-insani davranış kimi məsələlərlə məşğul olsun”, - nazir bildirib.

“Biz bəyan edirik ki,  hər hansı bir təsisat Azərbaycanla münasibətdə bu cür qeyri-etik ifadə formasını seçirsə bizim tərəfimizdən də adekvat və qeyri-adekvat formada öz cavabını alacaq”, - E.Məmmədyarov vurğulayıb.