Ermənilər Xocalı aeroportunu işə salmağa hazırlaşırlar

“Stepanakert aeroportu Yeni İlin başlanğıcında texniki uçuşlara başlayacaq”, bu barədə Qarabağ “hökumətinin” rəhbəri Ara Arutyunyan bildirib.

“Aeroport hava gəmilərinin qəbuluna hazırdır və biz yeni il bayramından sonra ilk uçuşu hər gün gözləyirik”, deyə Arutyunyan dekabrın 28-də mətbuat konfransında bildirib. Onun sözlərinə görə, “əvvəlcə 3-4 ay ərzində texniki uçuşlar həyata keçiriləcək, texniki prosedurlar başa çatdıqdan sonra sərnişin daşımaları başlayaca”.

Arutyunyan qeyd edib ki, artıq uçuşları gecikdirəcək heç nə yoxdur, lakin ilk reysin tarixi müəyyən edilməyib. Ermənistan tərəfi aeroportdan gündə 1-2 dəfə Yerevana uçuşlar həyata keçiriləcəyini planlaşdırır. Aeroportun 2011-ci il sentyabrın ortalarında açılması nəzərdə tutulurdu. Lakin Bakının uçuşların qanunsuz olması və Azərbaycanın onların həyata keçirilməsinə imkan verməyəcəyi barədə xəbərdarlıqlarından sonra Ermənistan tərəfi uçuşlara başlamaqdan imtina edib.

Beynəlxalq təşkilatlar tərəfləri vəziyyəti gərginləşdirməməyə və sülh yolu tapmağa çağırıblar. 

Xatırladaq ki, aeroport 1992-ci il fevralın 25-26-da ermənilər tərəfindən işğal edilmiş Xocalı şəhərində yerləşir. Şəhərin işğalı zamanı yüzlərlə yerli sakin qətlə yetirilib. -02D-