Ermənistan Türkiyə ilə münasibətlərin normallaşdırılması üzrə protokollardan imtina edir

Bakı/13.12.17/Turan: Ermənistan Türkiyə ilə imzalanmış ikitərəfli münasibətlərin normallaşdırılması haqqında protokollardan imtina etməyə hazırlaşır. Bu barədə bu gün Ermənistan XİN başçısı Edvard Nalbandyan Yunanıstan Xarici İşlər Nazirliyində çıxış edərkən bildirib.

"Məlum olduğu kimi, Türkiyə ilə münasibətlərin normallaşdırılması prosesi Ermənistan prezidenti Serj Sarkisyanın təşəbbüsü ilə start götürmüşdü və 2009-cu ildə Sürix protokollarının imzalanmasına gətirib çıxarmışdı. Bununla birlikdə, bu sənədlər indiyədək ratifikasiya olunmayıb, belə ki, Türkiyə protokolların hərfi mənasına və məğzinə ziddir. Bu protokollar daim girov kimi qala bilməz və bu səbəbdən Ermənistan prezidenti sentyabrda BMT Baş Assambleyasının tribunasından Ermənistanın onları əhəmiyyəsiz elan edəcəyini bəyan edib və biz 2018-ci ilin yazını bu protokollarsız qarşılayacağıq", deyə Nalbandyan bildirib.

Xatırladaq ki, protokollar sərhədlərin açılmasını, diplomatik səviyyədə münasibətlərin bərpasını və siyasi və iqtisadi sahələrdə tamdəyərli münasibətlərin yaradılmasını nəzərdə tuturdu.

Bu sənədlər Bakının kəskin etirazlarına səbəb olub, Bakı Ankaranı Ermənistandan Azərbaycanın işğal edilmiş ərazilərini azad etməyi tələb etməyə çağırıb. Ankaranın bu şərtləri yerinə yetirmək tələblərindən sonra Yerevan Sürix Protokollarının həyata keçirilməsinin qeyri-mümkün olduğunu bildirib. -02D-