Ermənistanın işğal etdiyi ərazilər talan edilir - Azərbaycan XİN

Bakı/06.11.18/Turan: Ermənistan silahlı qüvvələrinin işğalı altında olan ərazilərin 261 min hektar meşə sahəsi, o cümlədən qiymətli meşə sahələri, təbiət abidələri və pasportlaşmış 145 Şərq Çinarı məhv edilib. Bu barədə Azərbaycan XİN-in noyabrın 6-da qeyd edilən Müharibələr və Silahlı Münaqişələr zamanı Ətraf Mühitin İstismarının qarşısının alınması Günü ilə əlaqədar yaydığı şərhdə deyilir.

Azərbaycanın təbiətinə, bioloji müxtəlifliyinə böyük ziyan dəyib.

Bundan başqa, işğal olunmuş ərazilərdən keçən təbii su mənbələri Ermənistan tərəfindən geniş miqyaslı çirklənməyə məruz qalır: "Araz və Kür çaylarının qolları olan Oxçuçay və Ağstafaçayın Ermənistan tərəfindən kəskin çirkləndirilməsi nəticəsində sözügedən çaylarda canlı aləmin yaşayışı üçün ciddi təhlükə yaranıb".

Şərhdə deyilir ki, Tərtər çayı üzərində inşa edilmiş və 100 min hektardan artıq əkin sahəsinin suvarılmasına hesablanmış Sərsəng su anbarından qış mövsümündə sahələrin su atında qalması, yay aylarında isə kəskin su qıtlığı yaratmaqla dağətəyi və aran hissədə məskunlaşan 400 min əhalini təhlükə altında saxlanılır.

Azərbaycanın qarşı tərəfin nəzarətində olan ərazilərində 163 faydalı qazıntı yataqları, o cümlədən qızıl, civə, mis, qurğuşun, sink, daş kömür və digər sərvətlər talan edilir.

Azərbaycan ərazilərində ətraf mühit və təbii sərvətlərii istismar edən Ermənistanın bu siyasəti bölgənin dayanıqlı inkişafı və tərəqqisinə münasibətdə tutduğu laqeyd və qeyri-konstruktiv mövqeyini bir daha bariz şəkildə nümayiş etdirir, deyə məlumatda bildirilir. -05D06-