Fəal Azər Kazımzadə Tbilisidə sərbəst buraxılıb (YENİLƏNİB)

Bakı/20.09.18/Turan: Dünən axşam Tbilisidə saxlanılan Azərbaycanlı fəal, bloger və jurnalist Azər Kazımzadə səhərə yaxın sərbəst buraxılıb.

Kazımzadənin Turan agentliyinə verdiyi məlumata görə, dünən gündüz o, küçədə üç nəfər tərəfindən izlənildiyini hiss edib. "Birini tanıdım - o, əvvəllər də məni izləyən azərbaycanlı idi. Evə qayıtdım və israrla qapım döyüldü. Amma heç kim suallarıma cavab vermirdi. Bundan sonra qapını qırmağa başladılar. Polisin 112 nömrəsinə zəng vurdum, bundan sonra qapını döyənlər getdi. Pəncərədən baxdım və məni izləyən həmin azərbaycanlını tanıdım", deyə Kazımzadə bildirilib.

10 dəqiqə sonra polis gəlib və 15 dəqiqə sonra (saat 22.00 radələrində) Kazımlını hansı qisimdə aparıldığını açıqlamadan, polisə aparıblar.

"Vake-Sabutarlinskin birinci polis bölməsində məni Bakı polisindəki kimi dindirməyə başladılar: "İlham Əliyevi niyə tənqid edirsən?", "Niyə demokratik ölkələrə deyil, Gürcüstana gəldin?", "Hansı vəsaitlə yaşayırsan?", "Bank hesabların varmı?".

Bu dindirmə 3 saat davam edib. Vəkil gəldikdən sonra vəziyyət dəyişib. Məndən təhdidlər barədə ifadə alıblar. 2,5-3 saat sonra məni sərbəst buraxıblar", deyə Kazımzadə bildirib. Onun sözlərinə görə, hazırda o, kirayə qaldığı evdədir, amma özünü təhlükəsizlikdə hiss etmir.

"İndi evdəyəm. Bəlkə də polisə müraciət etməyimdən sonra iki-üç gün sakitlik olacaq, amma təhdidlərin bərpa olunmayacağına zəmanət yoxdur.

Son 10 gündür Azərbaycandakı ailəmə təzyiq göstərilir. Lerikdə polis nümayəndəsi atama deyib ki, Gürcüstanda məni bezdirəcəklər. O, mənim facebook-dan Heydər Əliyevin Şəki və Lənkəranda üzərində qum saatı - Oyan Hərəkatının rəmzi çəkilən abidələrinin fotoşəklini yığışdırmağımı və ümumiyyətlə, hakimiyyəti tənqid etməyə son qoymağımı və sakit oturmağımı tələb ediblər. Gürcüstanda qalmağım təhlükəlidir, Əfqan Muxtarlının taleyini yaşamaq istəmirəm", deyə Kazımzadə bildirib. O, ABŞ, Niderland, Almaniya, Fransa səfirliklərinə müraciət etmək niyyətindədir.

Oyan Hərəkatı 6 mart 2016-cı ildə Amsterdamda bir qrup azərbaycanlı siyasi mühacir tərəfindən təsis edilib. Qum saatı - hərəkatın emblemi zamanın axdığını - xalqın öz hüquqları uğrunda mübarizə üçün tədricən oyandığını əks etdirir.

Gürcüstan və Azərbaycanın hüquq-mühafizə orqanlarının nümayəndələri hələlik vəziyyəti şərh etmir. -03B06-

* * *

2018 Sentyabr 20 (Cümə axşamı) 12:14:46

Düşün.tv internet saytının rəhbəri Tbilisidə saxlanılıb

Bakı/19.09.18/Turan: Düşün TV internet televiziyasının rəhbəri Azər Kazımzadə sentyabrın 19-da axşam saatlarında Tbilisi şəhərində saxlanılıb.

"Hal-hazırda polislər məni Tbilisidə polis idarəsinə aparırlar", o özü sentyabrın 19-da Bakı vaxtı ilə saat 22.20-də facebook səhifəsində yazıb.

Hazırda Fransada mühacirətdə olan Azadlıq qəzetinin baş redaktoru Qənimət Zahid Bakı vaxtı ilə saat 22.25-də Azər Kazımzadə ilə telefonla danışıb.

"Azər Kazımzadə ilə indi danışa bildim. Telefonu 5 dəqiqəliyə ona verdilər. Hazırda polisdədir. Saxlanılmasının səbəbi bəlli deyil. Gürcüstandakı hüquq müdafiə təşkilatlarına dərhal məlumat verilməlidir. İkinci Muxtarlı olayı bu dəfə açıq şəkildə təkrar oluna bilər", Qənimət Zahid facebook səhifəsində yazıb.

"Azər hazırdaTbilisinin Vake rayon polis bölməsindədir", keçmiş siyasi məhbus kimi tanınan Rəsul Mürsəlov yazıb.

Bununla yanaşı, rəsmi qurumlar Azər Kazımzadənin saxlanılması barədə hələ məlumat yaymayıb. Onun saxlanılmasının sbəbləri də bəlli deyil.

Azər Kazımzadə bir ildən çoxdur Tbilisidə yaşayır. O Azərbaycan iqtidarını kəskin tənqid edən reportajlarla çıxış edir. Son müsahibəsini sentyabrın 18-də Milli Şuranın sədri Cəmil Həsənlidən götürüb.Onun facebook səhifəsində də iqitdarın kəskin tənqidi əks olunmuş kollajlar və şüarlar var.-0-