Fransa Azərbaycanı müstəqil, güclü, demokratik dövlət kimi görmək istəyir

  Fransa və Azərbaycan arasında siyasi münasibətlər uyğun maraqlara əsasən səmimi dialoq atmosferi ilə xarakterizə olunur. Bunu Fransanın Bakıdakı səfiri Paskal Monye iyulun 15-də Fransanın milli bayramı – Bastiliyanın alınması günü münasibətilə keçirilən təntənəli qəbulda söyləyib.

“Fransa Azərbaycanı müstəqil, güclü, demokratik dövlət kimi görmək istəyir”, - səfir bildirib. O, İran və Suriya məsələlərində Azərbaycanla Fransanın mövqelərinin üst-üstə düşdüyünü bildirib.

Qarabağ münaqişəsinə toxunan səfir qeyd edir ki, “ATƏT-in Minsk Qrupunun sədri kimi Fransa münaqişənin həlli üzrə səylərini davam etdirəcək”.

Azərbaycan və Ermənistanı Fransaya dost ölkələr adlandıran səfir Fransa-Azərbaycan və Fransa-Ermənistan  parlamentlərarası dostluq qrupları çərçivəsində iki ölkə deputatlarının görüşünün təşkili ilə bağlı Fransa Senatının spikerinin təşəbbüsünü xatırladıb. 

İqtisadi münasibətlərə toxunan Monye artmaqda olan dinamikanı qeyd edib. Əgər 2010-cu ildə Fransadan Azərbaycana idxal 100 mln. avro təşkil edirdisə, bu ilin 5 ayında 185 mln. avroya çatıb..

Qarşıdakı payızda Bakıda keçiriləcək iqtisadi əməkdaşlıq üzrə hökumətlərarası komissiyanın növbəti iclası əməkdaşlığa əlavə təkan verəcək.

Səfir kosmik sahədə əməkdaşlığı da xüsusilə qeyd edib və Azərbaycan peykinin buraxılmasında Fransa şirkətlərinin iştirakını bildirib.

Bundan əlavə, Fransa şirkətləri Azərbaycanın infrastruktur və nəqliyyat layihələrində, o cümlədən Bakı metrosunun inkişafında fəal iştirak edir.

Səfir Fransa-Azərbaycan Ticarət Palatasının tezliklə Azərbaycan Ədliyyə Nazirliyi tərəfindən qeydiyyata  alınacağına ümidvar olduğunu bildirib.

Mədəniyyət, elm və təhsil sahələrində də əlaqələr uğurla inkişaf edir. 

Azərbaycan hökumətinin adından çıxış edən maliyyə naziri Samir Şərifov ikitərəfli münasibətlərin geniş müqavilə-hüquqi bazasının olduğunu qeyd edib, 42 sazişin imzalandığını bildirib.

Onun sözlərinə görə, Fransa şirkətləri Azərbaycanda 1,5 mlrd. avro dəyərində layihələrdə iştirak edirlər. Eyni zamanda Fransa bankları Azərbaycanda layihələrin kreditləşməsi üçün 2 mlrd. avro ayırıblar.

Maliyyə naziri Azərbaycanın bundan sonra da ticari-iqtisadi əlaqələrin inkişafında maraqlı olduğunu bildirib.—06C