Frontline Defenders Hilal Məmmədovun azadlığa buraxılmasını tələb edir

Hüquq müdafiəçilərinin qorunması üzrə beynəlxalq  fond - Front Line Defenders  iyunun 21-də heroin saxlanmasında ittiham olunaraq həbs edilmiş Hilal Məmmədovun müdafiəsinə qalxıb.

O, Sülh və Demokratiya İnstitutunun məsləhətçisi və Azərbaycanda talış dilində nəşr edilən yeganə qəzet - Tolishi Sado qəzetinin baş redaktorudur.

H.Məmmədov həmçinin 2008-ci ildə İranın xeyrinə casusluqda ittiham olunan və 2010-cu ildə həbsxanada işgəncələr nəticəsində ölən tanınmış alim Novruzəli Məmmədovun hüquqların Müdafiə Komitəsinin rəhbəri olub.

Frontline Defenders H.Məmmədovun təqib edilməsini pisləyir və hesab edir ki, irəli sürülən ittiham onun hüquq-müdafiə fəaliyyəti ilə bağlıdır. “Biz Hilal Məmmədovun fiziki və psixoloji durumundan çox narahatıq”, - təşkilatın bəyanatında deyilir. Təşkilat Azərbaycan hakimiyyətini onu dərhal azad etməyə, bütün ittihamları üzərindən götürməyə, fiziki və psixoloji təhlükəsizliyin təmin etməyə, ona qarşı zorakılıq faktının hərtərəfli  və qərəzsiz araşdırılmasına çağırıb.

Təşkilat Azərbaycanda hüquq müdafiəçilərinin təhlükəsizliyinin təminatı üzrə təxirəsalınmaz  tədbirlərin həyata keçirilməsini, onların fəaliyyəti üçün normal şəraitin yaradılmasını, həmçinin milli azlıqların hüquqlarının müdafiəsini tələb edib. -02D-