Fuad Qəhrəmanlı AXCP-nin sədr müavini vəzifəsini tərk edib

Bakı/21.09.19/Turan: Azərbaycan Xalq Cəbhəsi Partiyasının (AXCP) sədr müavini Fuad Qəhrəmanlı dünən axşam vəzifəsindən istefa etdiyini bildirib.

O, bu addımı 18 yaşlı qızı Selcan Yağmurun atasının müntəzəm olaraq kiçik bacısı ilə onu, eləcə də anasını döydüyü haqqında açıq bəyanatından sonra atıb.

Qız atasını siyasi fəaliyyətində insan hüquqlarını müdafiə edərkən ailədə qızına və həyat yoldaşına qarşı zorakılıq törətdiyinə görə qınayıb.

Selcan Yağmurun sözlərinə görə, anası yazıçı Zümrüd Yağmur hələ bir neçə il əvvəl əri ilə boşanmaq istəyib, amma AXCP lideri Əli Kərimli ailəni qorumaq üçün onu fikrindən daşındırıb.

Qız bildirib ki, atasından imtina edir və anasının soyadını götürür.

Zümrüd Yağmur öz facebook səhifəsində qısa şəkildə qızının haqlı olduğunu təsdiq edib, daha sonra ətraflı bəyanat verəcəyini bildirib.

Qəhrəmanlı istefa verərkən ailə dramından siyasi möhtəkirliklər və AXCP-yə qarşı kampaniya üçün istifadə olunmasını istəmədiyini bildirib.

"Mənim ünvanıma ittihamlar təhrif edilib. Həbsimdən (2015-ci il) 4-5 il əvvələ qədər qısamüddətli ailə münaqişəsi yaşadım. Buna görə təəssüf edirəm. Həmin vaxt yaşanmış gərginlik övladlarımda travma yaradıb. Selcanın bəyanatı da bu travmadan irəli gələn emosional reaksiyadır", deyə F.Qəhrəmanlı yazıb.

O qeyd edir ki, qızı ilə mübahisə etməyi və onun əməllərinin səbəblərini aydınlaşdırmağı mənəvi nöqteyi-nəzərdən özü üçün qəbuledilməz hesab edir. -06D-