Gürcüstan hakimiyyəti azərbaycanlılara 23 məscid verib

Gürcüstan hakimiyyəti Kvemo Kartli (Borçalı) bölgəsində Gürcüstan Müsəlmanları İdarəsinə 23 məscid verməyi qərara alıb.

Müfti Begkar Kamaşidze bu qərarı müsbət qiymətləndirir. O, Frontnews nəşrinə bildirib ki, Gürcüstan Müsəlmanları İdarəsi hüquqi şəxsdir və Gürcüstan ərazisində mövcud olan bütün məscidlər qeydiyyata alınmalıdır.

“Biz bu məsələ üzərində işləyirik. Məhz Dini Məsələlər üzrə Dövlət Agentliyi Kvemo Kartlidə 23 məscidin Gürcüstan Müsəlmanları İdarəsinə verilməsi prosesinə şərait yaradıb.

Biz artıq bir neçə ildir məscidləri qeydiyyata almağı tələb edirik. Məlum olduğu kimi, Gürcüstanda 250 məscid var və onların çox az hissəsi qeydiyyatdan keçib”, deyə Kamaşidze bildirib.

Məscidlərin GMİ-yə verilməsi haqqında qərar çərşənbə günü Dinlər Şurasının iclasında verilib.

Xatırladaq ki, Kvemo Kartli bölgəsinin əsas əhalisi azərbaycanlılardır, onların sayı müxtəlif qiymətləndirmələrə görə 300 mindən 400 minə qədər təşkil edir.

2009-cu ilə qədər onların dini mərkəzi Bakıda yerləşən Qafqaz Müsəlmanları İdarəsi idi. Bu tarixdən sonra onlar Gürcüstan Müsəlmanları İdarəsinin himayəsinə keçiblər. -02D-