Həbs olunmuş fəal M.Orucovun səhhətində problemlər yaranıb

Azərbaycanın alternativ həmkarlar ittifaqı konfederasiyası olan "İşçi Masası"nın həbsdə olan üzvü Möhyəddin Orucovun səhhətində problemlər yaranıb. Bu barədə Turan-a onun anası Təranə Orucova bildirib.

O qeyd edib ki, 2023-cü ilin oktyabrında inzibati qaydada həbs edildikdən sonra onu uzun müddət açıq havada saxlayıblar və onun böyrəklərinə soyuq dəyib. Həbs dövründə onu müayinə etməyiblər, sadəcə olaraq ağrıkəsicilər veriblər. Azad edildikdən sonra fəal müalicə olunub, lakin 2023-cü ildə yenidən həbs edildiyinə görə müalicəsi yarımçıq qalıb.

Orucovun anasının sözlərinə görə, hazırda onun böyrəklərində ağrılar artıb. Onu xəstəxanaya yerləşdirməkdən imtina edirlər. Vəkil sabah yenidən onun xəstəxanaya köçürülməsi üçün müraciət edəcək.

Fəal həmçinin saxlanma şəraitindən şikayət edir. "4-5 nəfərlik kamerada 18 nəfər saxlanılır. Onlar növbə ilə yatırlar", deyə fəalın anası bildirib.

* Orucov 13 dekabr 2023-cü il tarixində külli miqdarda narkotik vasitənin dövriyyəsində (Azərbaycan CM-in 234.4.3-cü maddəsi) ittiham olunur.

Bir müddət əvvəl, 2023-cü ilin oktyabrında Orucov polisə tabe olmamaq ittihamı ilə inzibati qaydada 30 gün müddətinə həbs edilmişdi.

O, azad edildikdən sonra həbsinin əsl səbəbinin sosial şəbəkələrdə hakimiyyəti tənqid etməsi olduğunu bildirib. O, həmçinin polis bölməsində döyülməsindən və qeyri-insani rəftara məruz qalmasından şikayət edib.