Həmsədrlər regiona səfərin yekunları haqqında

ATƏT-in Minsk Qrupunun həmsədrləri regiona növbəti səfərlərinin yekunlarına həsr olunmuş press-reliz yayıblar.

Səfərin əsas məqsədi Dağlıq Qarabağ, Kəlbəcər və Laçında vəziyyətlə tanışlıq idi. Bu rayonlara səfər edən həmsədrlər infrastrukturda yaxşılaşma əlamətləri görüblər, amma son illərdə sakinlərin sayında dəyişiklik görməyiblər.

Həmsədrlər həmçinin Sərsəng su anbarına baş çəkiblər və onun statusu və ondan istifadə məsələlərini müzakirə ediblər. Tərəflərin bu su anbarından regionun rifahı üçün birgə istifadə haqqında razılıq əldə edəcəyinə ümid ifadə olunub.

Mayın 19-da həmsədrlər Tərtər yaxınlığında təmas xəttini keçiblər. Atəşkəs rejiminin pozulması və itkilərin davam etməsi ilə bağlı təəssüf ifadə edilib.

Bu pozuntuların tədqiqi mexanizminin olmaması tərəflərə bir-birini ittiham etmək imkanı verir.

Səfər çərçivəsində həmsədrlər Yerevanda və Bakıda yüksək vəzifəli məmurlar, habelə Qarabağ, Kəlbəcər və Laçında yerli administrasiya nümayəndələri ilə görüşüblər. Həmçinin, Bakıda Qarabağın azərbaycanlı icması ilə görüş keçirilib. Görüşdə dinc tənzimlənmə elementləri müzakirə edilib və qeyd edilib ki, uzunmüddətli sülh üçün əsas üç həmsədr ölkənin prezidentlərinin 2009 və 2013-cü ildə verdikləri birgə bəyanatlarda ifadə edilmiş elementlərdir, deyə press-relizdə bildirilir. -02D-