Hikmət Hacıyev və Armen Qriqoryan Əliyev-Paşinyan görüşünün mümkünlüyünü müzakirə edəcəklər

Bakı/30.04.22/Turan: Mayın 2-də Brüsseldə Ermənistan Təhlükəsizlik Şurasının rəhbəri Armen Qriqoryanın Azərbaycan prezidentinin köməkçisi Hikmət Hacıyevlə görüşü olacaq.

"Biz Ermənistan-Azərbaycan münasibətlərilə bağlı bir sıra məsələləri müzakirə edəcəyik", - Armen Qriqoryan “Azatutyun” TV-nin efirində bildirib. O, işarə edib ki, görüşün müsbət nəticəsi Paşinyan-Əliyev görüşünün təşkilinə imkan verəcək.

"Əgər biz Brüsseldə bütün bu suallara cavab ala bilsək, Brüsseldə ölkələrin liderləri səviyyəsində görüşü də müzakirə edə bilərik", -  o qeyd edib. Qriqoryan hansı məsələlərin müzakirə olunacağını və razılaşdırılacağını dəqiqləşdirməyib. Bunun cavabını qismən Paşinyanın timsalında Ermənistan rəhbərliyi verib. Bir həftə öncə o deyib ki, Azərbaycanın təklif etdiyi nizamlanmaya dair beş bənd Yerevan məqbuldur. Bununla o, dolayısı ilə etiraf edib ki, Yerevan Qarabağı Azərbaycanın tərkib hissəsi kimi tanımağa hazırdır. Lakin bu bəyanat Paşinyanın əleyhdarlarının, eləcə də Qarabağdakı separatçı liderlərin kəskin tənqidinə səbəb olub.

Cümə günü Yerevanda Paşinyan Qarabağ ermənilərinin liderlərilə görüşüb. Görüşün yekunları ilə bağlı Paşinyan deyib ki, o, Qarabağ “prezidenti” Arayik Arutyunyanın “Qarabağ hakimiyyəti də sülhlə bağlı gündəliyi qəbul edir” bəyanatını yüksək qiymətləndirir. Sülh gündəliyi məğlubiyyət gündəliyi deyil. Sülh gündəliyi müharibənin dəhşətlərini və ondan irəli gələn çətinliklərin aradan qaldırılması, xalqın təhlükəsizliyini, hüquqlarını, gələcəyini təmin etməkdir. Mən şadam ki, Arsax hakimiyyəti bu gündəliyi bölüşür”, - baş nazir deyib.

Öz növbəsində Arutyunyan bildirib ki, Qarabağ özünütəyinetmə hüququndan əl çəkməyəcək. O həmçinin əlavə edib ki, istənilən variant xalq tərəfindən dəstəklənməlidir. O, prinsipial məqamlar kimi təhlükəsizliyin təmin olunmasını və sosial-iqtisadi proqramları qeyd edib.

Onu deyək ki, artıq Ermənistan və Qarabağ rəhbərliyinin bəyanatlarında müstəqillik tələbi yoxdur. Həmçinin Qarabağın Azərbaycanın tərkibində mövcud ola bilməyəcəyi barədə bəyanatlar da yoxdur.

Bunun əvəzində Ermənistan tərəfi təkid edir ki, Qarabağda Rusiya sülhməramlılarının daim olmasına, Qarabağın Azərbaycan hakimiyyətinə birbaşa tabeliyindən imtina edilməsinə, həmçinin siyasi və iqtisadi müstəqilliyə təkid edir. Bundan əlavə, BMT, ATƏT-in timsalında beynəlxalq birlik Qarabağ ermənilərinin təhlükəsizliyinə, mədəni və digər hüquqlarının təmin olunmasına zəmanət verməlidir. Faktiki olaraq bu, hansısa Dağlıq Qarabağ Muxtar Vilayətini bərpa etmək cəhdi kimi bir şeydir. Lakin bu gözləntilər Bakının mövqeyinə ziddir. -02B-