Hilal Məmmədova qarşı şahid məhkəmədə təkrar dindirilib

Bu gün Ağır Cinayətlərə dair işlər üzrə Bakı məhkəməsində “Tolışi Sədo” qəzetinin redaktoru Hilal Məmmədovun işi üzrə proses davam edib. Bu iclas da əvvəlkilər kimi qapalı rejimdə keçirilib.

Vəkil Xalid Bağırovun Turan-a verdiyi məlumata görə, Hilal Məmmədovun vəsatəti üzrə iclasda ona qarşı əsas şahid Elman Quliyev təkrarən ifadə verib.

Bu şəxs qəzetin əvvəlki redaktoru Novruzəli Məmmədovun işində də ittiham tərəfin əsas şahidi olub. Elman Quliyev 6 il müddətinə azadlıqdan məhrum edilib və cəzasını çəkərək, yenicə azadlığa çıxıb. 

2012-ci ilin iyununda hələ həbsxanada ikən o, H.Məmmədova qarşı ifadə verib, baxmayaraq ki, bundan əvvəl Novruzəli Məmmədova qarşı prosesdə Hilal Məmmədovu tanımadığını iddia edirdi.

Bu gün Elman Quliyev H.Məmmədova qarşı “dövlət əleyhinə fəaliyyət” ittihamlarını təkrar edib. O iddia edib ki, bu barədə mərhum Novruzəli Məmmədov çoxdan ona danışıb.

Lakin o, dövlət əleyhinə fəaliyyətin məhz nədən ibarət olduğu və bu qədər vaxt niyə susduğu barədə suallara cavab verə bilməyib.

Əvvəlki ifadələrinə zidd olaraq, Quliyev indi iddia edir ki, H.Məmmədovla 2006-cı ildə çayxanada görüşüb və şair Əli Nasir və mühacirətdə olan Ataxan Əbilov bunun şahidi olub.

Bu zaman Quliyev müdafiə tərəfin təqdim etdiyi sözügedən şəxslərin bu görüşdə iştirak etməmələri haqqında ifadələrə heç bir cavab verə bilməyib.

H.Məmmədov özü Quliyevin ifadələrini “psixi cəhətdən xəstə insanın” sözləri adlandırıb. 

Növbəti məhkəmə iclası aprelin 10-da keçiriləcək.

* Xatırladaq ki, 2012-ci il iyunun 21-də həbs edilmiş Hilal Məmmədov üç maddə ilə ittiham olunur – dövlətə xəyanət, qanunsuz narkotik saxlamaq və milli ayrı-seçkilik salmaq. Lakin beynəlxalq ictimaiyyət və yerli hüquq müdafiəçiləri onu vicdan məhbusu hesab edir. Uydurma dövlətə xəyanət ittihamlarından istifadə edən hakimiyyət prosesi qapalı keçirir. -06B-