Human Rights Watch Tofiq Yaqublu barəsində hökmü pisləyir

Bakı/04.09.20/Turan: Human Rights Watch (HRW) hüquq müdafiə təşkilatı Azərbaycanlı müxalif siyasətçi Tofiq Yaqublu barəsindəki hökmü pisləyib.

“Azərbaycanda ədalətli mühakimənin ələ salınmasının daha bir nümunəsi uydurma “xuliqanlıq” ittihamı ilə dörd il üç ay müddətinə azadlıqdan məhrum edilən ölkənin azsaylı alternativ siyasi səslərindən biri Tofiq Yaqublu barəsindəki hökm oldu.

Hökm gözlənilməz deyildi və Azərbaycan hakimiyyətinin qanunun aliliyini pozmağa və hökumətin tənqidçilərini susdurmağa nə dərəcədə hazır olduğunu nümayiş etdirir”, deyə HRW-nin departament direktoru Giorgi Gogia bildirib.

59 yaşlı Yaqublu müxalif Müsavat Partiyasının üzvü və Demokratik Qüvvələrin Milli Şurasının – Azərbaycanın müxalif partiyalarının və fəallarının koalisiyasının yüksək vəzifəli nümayəndəsidir. Keçmiş jurnalist Yaqublu tez-tez Azərbaycanda insan hüquqları sahəsindəki problemləri tənqid edirdi.

Bu, Yaqublunun siyasi motivlərlə ilk həbsi deyil. O, uydurma iğtişaşlara təhrik etmə ittihamı ilə üç il həbsdə saxlanılıb, 2016-cı ildə azad edildikdən sonra isə 2019-cu ilin oktyabrında icazəsiz mitinqdə iştiraka görə yenidən həbs edilib.

Martın 22-də, prezident İlham Əliyevin Covid-19 pandemiyasına qarşı mübarizədən siyasi müxalifəti boğmaq üçün istifadə edəcəyinə eyham etməsindən bir neçə gün sonra polis Yaqublunu YNH-də və digər maşının sürücüsünü döyməkdə ittiham edərək həbs edib.

Hakimiyyət tələsik Yaqublunun işi üzrə məhkəmə prosesi keçirib, müdafiə tərəfin bütün vəsatətlərini, o cümlədən videomüşahidə kameralarının Yaqublunun versiyasını təsdiq edə biləcək görüntülərinə baxmaq xahişini rədd edib.

“Yaqublunun həbsi hökumətin öz tənqidçilərini həbsə atmaq üzrə amansız kampaniyası çərçivəsində sonuncu addım oldu. Son bir neçə ay ərzində hakimiyyət müxalif partiyaların onlarla sıravi üzvünü və yüksək vəzifəli müxalif siyasətçini həbs edib, saxlayıb və hədələyib”, deyə HRW qeyd edir. -16D-