İ.Əliyev: TANAP 2018-ci ildə işə salınacaq

Transanadolu qaz kəməri (TANAP) 2018-ci ildə işə salına bilər. Bu barədə prezident İlham Əliyev Türkiyə baş naziri Recep Tayyip Erdoğanla danışıqları başa çatdıqdan sonra keçirilən mətbuat konfransında bildirib.

Erdoğan qeyd edib ki, Bakı-Tbilisi-Ceyhan neft kəməri, Bakı-Tbilisi-Erzurum qaz kəməri və Bakı-Tbilisi-Qars dəmir yolu layihələri Azərbaycan və Türkiyənin qardaşlığının və həmrəyliyinin göstəriciləridir.

Onun sözlərinə görə, danışıqlar zamanı tərəflər siyasət, iqtisadiyyat, mədəniyyət, hərbi və ticarət sahələrində münasibətlərin inkişaf etdirilməsi məsələlərini müzakirə ediblər.

Nazirlər səviyyəsində həmçinin energetika və hərbi sahələrdə əlaqələrin inkişafı məsələləri də ətraflı müzakirə olunub, deyə Türkiyə baş naziri bildirib. “Son vaxtlar Türkiyə və Azərbaycan arasında yüksək səviyyədə səfərlər sıxlaşıb. Onlar bundan sonra da davam etdiriləcək”, deyə Erdoğan bildirib.

TANAP-ın bünövrəsinin nə zaman atılacağı haqqında suala cavabda Erdoğan bildirib ki, indi Türkiyədə hazırlıq gedir, boru kəmərinin keçəcəyi yerlərdə torpaq sahələri alınır. Onun fikrincə, bünövrənin atılması mərasimi bu ilin sonuna qədər baş tuta bilər.

Öz növbəsində, Əliyev qeyd edib ki, TANAP Azərbaycan və Türkiyənin birgə layihəsidir.

 “Hər şey qrafikə uyğun gedir. Hesab edirəm ki, 2018-ci ildə əziz qardaşımla birlikdə bu layihənin açılış mərasimini keçirəcəyik”, deyə Əliyev bildirib.

Erdoğan Ankarının Qarabağ məsələsində Azərbaycana dəstək mövqeyinin dəyişməz olduğunu bildirib.

Bakıda nurçuların Azərbaycandakı fəaliyyəti məsələsini müzakirə edib-etmədiyi barədə suala cavabda Erdoğan bildirib ki, bütün seçkilərdən sonra o, ilk səfəri Azərbaycana edir.

 “Təbii olaraq, biz bu səfərlər zamanı hər bir problemi, o cümlədən bizdə narahatlıq doğuran məsələləri müzakirə edirik”, deyə Erdoğan bildirib.

İlham Əliyev öz növbəsində nurçularla əlaqəsi olan şəxslərin vəzifələrindən azad edilməsi haqqında məlumatlara şərh vermək xahişinə birbaşa cavabdan yayınıb.

O deyib ki, iki ölkə liderləri arasında görüşlər müntəzəm xarakter daşıyır və görüşlər zamanı bir çox məsələlər müzakirə olunur.

“Müttəfiq, dost, qardaş olaraq, biz geniş sahələr dairəsini müzakirə edirik. Əsas odur ki, biz bütün sahələrdə həmfikirik. Bizə bir qram olsun zərər vuran heç bir məsələni qəbul etmirik”, deyə Əliyev bildirib.

Onun sözlərinə görə, Azərbaycan-Türkiyə birliyi hər iki ölkə xalqının gələcəyi naminə davam etdirilməlidir.

Səfər zamanı Erdoğanı energetika və müdafiə nazirləri də müşaiyət ediblər.

Erdoğanın işgüzar səfəri başa çatıb. -06D-