İlham Əliyev: Avropaya inteqrasiya bizə lazım deyil (YENİLƏNİB)

Azərbaycan Nazirlər Kabinetinin iqtisadi məsələlərə həsr olunmuş iclasında İlham Əliyev dünyadakı böhran və Yaxın Şərqdəki vəziyyət, Avropada mühacirlərin problemləri, avropalıların qaçqınlara münasibətdə insafsızlığı haqqında danışmaq qərarına gəlib. O, çıxışına məhz bununla başlayaraq, bütün bu böhranların neft hasil edən ölkələrə təsir göstərdiyini xatırladıb.

Daha sonra o, Azərbaycanın öz yolu ilə getdiyini və heç kimi dinləmədiyini yada salıb. “Buna görə bizdə sabitlik və inkişaf var”, deyən Əliyev Avropaya inteqrasiya çağırışlarını pisləyib.

“Biz hansı Avropaya inteqrasiya etməliyik? Böhran bürüyən Avropaya? Müsəlmanlara qadağalar tətbiq olunan Avropaya? Bax, biz bu sualları verdiyimizə görə bizə təzyiq göstərilir və ittihamlar irəli sürülür”, deyən prezident oradaca da əlavə edib ki, Azərbaycan Avropa İttifaqı ilə sıx əməkdaşlıq edir.

Onun sözlərinə görə, Avropa Komissiyasında indi Bakının Aİ və Azərbaycan arasında əməkdaşlıq formatı haqqında təklifləri müzakirə olunur.

Daha sonra o bildirib ki, Avropa Şurası ilə “fəal iş” nəticə verib və orada vəziyyət dəyişib. “Biz əməkdaşlığa hazırıq, amma inteqrasiyaya yox. Qoy inteqrasiyaya çağıranlar bunu unutsunlar”, deyə Əliyev vurğulayıb.

“Bax, bu fonda Azərbaycan uğurla inkişaf edir”, deyən Əliyev nümunə kimi Humanitar Forum, “Formula-1” yarışı, Şahmat Olimpiadasının keçirilməsini, Roma Papasının səfərini göstərib.

Daha sonra o, Konstitusiyaya dəyişikliklər üzrə referenduma toxunub, AŞPA missiyasının referenduma “yüksək qiymət” verdiyini və inkişaf etmiş ölkələri Azərbaycandan “demokratiya öyrənməyə” çağırdığını xatırladıb.

O, İslam Əməkdaşlığı Təşkilatının və Avropa Parlamentinin Azərbaycanı dəstəklədiyini xatırladıb. Xüsusən, o, Avropa Parlamentinin Qarabağ münaqişəsi üzrə rəsmi bəyanatda ifadə olunmuş “çox ədalətli mövqeyini” yada salıb.

Doğrudur, bundan əvvəl Avropa Parlamenti özünü “səhv” aparırdı, amma bu yaxınlarda onlar özləri münasibətləri normallaşdırmaq üçün gəlmişdilər. “Onlar başa düşüblər ki, təzyiqlə heç nəyə nail olmayıblar, biz isə konstruktiv mövqe nümayiş etdirdik”, deyə Əliyev bildirib. -02D-

2016 Oktyab 07 (Cümə) 12:06:40

Cümə günü prezident İlham Əliyevin sədrliyilə bu ilin 9 ayı ərzində iqtisadi inkişafın yekunlarına dair iclas başlayıb.

İclasda dövlət başçısı, səhiyyə, təhsil nazirləri, Qaçqınlarla İş üzrə Dövlət Komitəsinin   rəhbəri çıxış ediblər.

Hələlik rəsmi orqanlar tədbir haqda ətraflı məlumat dərc etməyiblər.16D-